विश्वकपः थौं शुक्रवाः व शनिवाः क्वार्टरफाइनल कासा

विश्वकपः थौं शुक्रवाः व शनिवाः क्वार्टरफाइनल कासा

   २०७५ आषाढ २२, शुक्रबार          Newadaboo

विश्वकप फुटलब कासा अन्तर्गतया क्वार्टरफाइनल कासा थौं शुक्रवाःनिसें न्ह्यानाः कन्हय् शनिवाः क्वचाइगु जूगु दु ।

रसियाय् जुयाच्वंगु उगु कासा अन्तर्गत थौं शुक्रवाः निगू कासा जुइ, गुकी न्हापांगु कासा नेपाली ई कथं बहनी ७ः४५ ता इलय् उरुग्वें फ्रान्सया सामना याइसा निगूगु कासा कथं चान्ह् ११ः४५ ता इलय् ब्राजिल व बेल्जियया भिडन्त जुइगु जूगु दु ।

जुयाच्वंगु विश्वकप कासाय् उरुग्वें पोर्चुगलयात २–१ गोल अन्तरं बुकाः क्वार्टरफाइनलय् थःगु थाय् सुरक्षित याःगु खः ।

थुखे फ्रान्सं धाःसा वंगु संस्करणया उपविजेता अर्जेन्टिनायात ४–३ गोल अन्तरं वांछ्वयाः क्वार्टरफाइनलय् थ्यंकूगु खः । उरुग्वे व फ्रान्स विश्वकपया पूर्व विजेता नं खः ।

क्वार्टरफाइनलया यात्रा तय यायेगु झ्वलय् न्याक्वःतक विश्वकप त्याकेधुंकूगु बाजिलं मेक्सिकोयात २–० गोल अन्तरं बुकूगु खःसा बेल्जियमं जापानयात ३–२ गोल अन्तरं बुकूगु खः ।

अथेहे, असार २३ गते शनिवाः बहनी ७ः४५ ता इलय् स्वंगूगु क्वार्टरफाइनल कासाय् स्वीडेन व इंग्ल्याण्ड ल्वाइगु जूगु दुसा प्यंगूगु व लिपांगु क्वार्टरफाइनल कासा कथं शनिवाः चान्हय् ११ः४५ ता इलय् ग्वसाः खलः रुस व क्रोएसिया दथुइ भिडन्त जुइगु जूगु दु ।

उगु कासाया विजेता पुचः विश्वकपया सेमिफाइनलय् थ्यनी । सेमिफाइनल कासा असार २६ व २७ गते जुइगु जूगु दु ।

Views: 0