‘पहिचानया नितिं झी दक्वं छधी छप्पं जुइनु‘

‘पहिचानया नितिं झी दक्वं छधी छप्पं जुइनु‘

   ने. स. ११३६ चिल्लागा दुतिया          नेवाः दबू सम्वाददाता

हलिं नेवाः दबूया केन्द्रिय अधिवेशन वइगु मार्चया २५ निसें २७ तक्क अमेरीकाया बाल्टिमोरय् जुइत्यंगु दु । अथे धइगु अधिवेशन थौंनिसें हे न्ह्याइ । उखेया ई कथं न्हिनसिया ३ताः इलय् अधिवेशन न्ह्याइ सा नेपालया ई कथं थौं चान्हसिया १२ः४५ जूवइ । थौंनिसें न्ह्यायेत्यंगु हलिं नेवाः तःमुँज्याया नितिं थीथी देशं नेवाःत बाल्टिमोरय् मुनेधुंकूगु दु । व ह तःमुँज्यायात कया: दबूया केन्द्रिय समितिया छ्यान्जे लिसें प्रवक्ता सुभाष प्रजापतिलिसे नेवाः दबूया खँल्हाबल्हा थन न्ह्यब्वयाच्वना – सं.

  • हलिं नेवाः दबूया आः जुइत्यंगु हलिं नेवाः मुँज्याया तयारी गुकथं जुयाच्वंगु दु ?

निक्वःगु हलिं नेवाः मुँज्याया लागि पूर्व तयारी क्वचाःगु दु । मार्चया २५, २६ व २७ स्वन्हु जुइगु थुगु ज्याझ्वःया लागि यक्व न्ह्यःनिसें तयारी जुयाच्वंगु खः ।

थुगुसी अमेरिकाया बाल्टिमोरय् जुइगु थुगु मुँज्याय् अनया निगू स्थानीय संस्था नेपाः पासा पुचः अमेरीकाय् व नेवाः अर्गनाइजेसन अफ अमेरीकालिसे जानाः यायेत्यनागु खः । थ्व निगुलिं संस्थाया नायःपिं मय्‌जु सरोज प्रजापति व भाजु रामलाल श्रेष्ठलगायत दक्वं दुजःपिन्सं यक्व हे मेहनत यानादीगु दु । थीथी पेपर प्रिजेन्टेशन, सांस्कृतिक ज्याझ्वः, नेवाः भ्वय्, थीथी ब्वज्याया लागि पूर्व तयारी बांलाक क्वचाःगु दु ।

थुकियालिसें ज्याझ्वःया मूपाहां नेवाः न्ह्यलुवाः मल्ल के. सुन्दर, मू न्वचुमि राजेन्द्र श्रेष्ठ, नेपाः च्याप्टरया नायः पुष्कर माथेमा लगायत नेपाःया नीन्याम्ह पाहांपिं अमेरिका थ्यंकः झायेधुंकूगु दु । अथेहे बेलायत, रुस, नेदरल्याण्ड, पोर्चुगल, जापान, कतार, क्यानाडा थीथी देय्या पाहांपिं नं थ्यंकः झायेधुंकूगु दु । अमेरिकाया हे थीथी राज्यपाखें पाहांपिं वयेगु क्रम न्ह्याना हे च्वनतिनि ।

 

  • अधिवेशनया झ्वलय् स्वन्हु छु गुकथंया ज्याझ्वः जुइत्यंगु दु ले ?

स्वन्हुया ज्याझ्वलय् न्हापांगु दिं शुक्रवाः दर्ता व म्हसीका कालबिल लिसें वल्र्ड नेवाः अर्गनाइजेशनया थीथी च्याप्टरपाखें गतिविधिया जानकारी मुँज्या जुइ ।

निन्हुगु दिनय् औपचारिक उलेज्याझ्वः जुइ । थुकिइ अमेरिकाया लागि नेपाःया राजदूत डा.अर्जुनबहादुर कार्की विशेष पाहां कथं झायादी । वयां लिपा छगू हे इलय् निगू थासय् थीथी पेपर प्रेजेन्ट यायेगु ज्याझ्वः जुइ । उकी नेवाः भाय् संस्कृतिलिसें नेवाः व्यवसाय, लजगाः, ल्याय्‌म्ह पुस्ताया आवध्दता आदि कथंया थीथी बिषयस पेपर प्रेजेन्ट यायेगु ज्या जुइ ।

सनिलय् रिभाइभिङ नेपालभाषा संकिपा क्यनेज्या व नेवाः भ्वय् जुइ । बहनी सांस्कृतिक ज्याझ्वलय् संजीप प्रधान, सरिश्मा अमात्य, राम श्रेष्ठ, यज्ञमान शाक्यपिनिगु विशेष प्रस्तुति दइसा राजेश धाख्वाःजुया डिजाइन व कोरियोग्राफिलिसें राजेशलाल संयोजनया फेशन शो ज्याझ्वः जुइ । थुगु सांस्कृतिक ज्याझ्वःया लागि भाजु महेन्द्र प्रधानजुं यक्व न्ह्यःनिसें माःगु संयोजन याना च्वनादीगु दु ।

थुगु हे दिनय् नेपालभाषाया सफू ब्वज्या, भाजु राजीभशंकर श्रेष्ठया सिक्किमया नेवाःतय् सम्वन्धय् च्वयातःगु सफू पितब्वज्या, हलिं नेवाः लुमन्तिपौ पितब्वज्या लिसें व्यापारिक मुनेज्या नं जुइ ।

स्वन्हुगु दिं आइतवाः खुन्हु सुथय् न्ह्यू वज्राचार्य, आनि छोइङ डोल्मापिनिगु सांगीतिक ज्याझ्वःलिसें कवि दुर्गालालया सुलिं २ म्येचाः पितब्वज्या जुइ । थुगु म्येचाः न्ह्यू वज्राचार्यया संगीत व प्रविन ताम्राकारया सलय् पिदनेत्यंगु खः । थुकियालिसे थुगु दिनय् नं पेपर प्रिजेन्ट यायेगु शेसन दु ।

वयांलिपा वल्र्ड नेवाः अर्गनाइजेशनया भावी ज्याझ्वःयात कयाः सहलह व थुगुसीया अमेरिका मुँज्याया घोषणापत्र पित बिइगु ज्या जुइ ।

 

  • न्हूगु कार्यसमितिया स्वरुप गज्याःगु जुइ ? थुकिया प्रक्रिया छु दु?

झीगु विधान कथं २७म्हेसिगु कार्यसमिति गठन जुइगु प्रावधान दु । नायः जुल, व धुंकाः वरीष्ठ उपाध्यक्ष छम्ह, उपाध्यक्ष प्यम्ह दु । व धुंकाः मू छ्यान्जे, छ्यान्जे, दां भरिं अले जन सम्पर्क अधिकृत धकाः छम्ह दु । मेपिं दक्वं केन्द्रिय सदस्य दइ ।

उम्मेदवारी बीगु नितिं झीसं फेब्रुअरी १४ तकया दुने उम्मेदवारी व सिफारीसया लागि ई क्वःछिना तयागु खः । लिपा उम्मेदवारी लित कायेगु खःसा उकिया नितिं मार्च १४ तक्कया ई क्वछिनागु जुल । थुकिया दुने दर्ता यानादीपिनिगु लिच्वः निन्हुया दिं शनिवाःखुन्हुया ज्याझ्वलय् घोषणा यायेगु जुइ ।

न्हूगु ज्यासना पुचः नीस्वनेत भाजु डा.महेश्वर वैद्यया संयोजनय् निर्वाचन समिति दयेकेगु ज्या जूगु खः । थुकिया बारे वय्ंकःपिन्सं जानकारी बियादी ।

 

  • थुगु अधिवेशनं छिकपिन्सं ल्ह्वनादीत्यनागु मुद्दा व हसना छु खः ?

थुगु अधिवेसनपाखें झीसं मुख्य रुपं Uniting together for Language, Culture and Identity धकाः धयागु दु । भाषा, संस्कृति व नेवाः पहिचानया नितिं झी दक्वं छधी छप्पं जुइनु धइगु झीगु हसना व उद्देश्य जुल । थ्वहे उद्देश्य पूवंकेत उद्देश्य अनुरुप थीथी ज्याझ्वः उकथं हे संयोजन जूगु दु ।

subhas

 

  • थुगु अधिवेशनय् सहभागिता गुलितक्क दइ थें च्वं ?

अधिवेशन यायेगु थाय् च्यासः क्षमताया खः । अनलाइन व अफलाइन यानाः आतक स्वसःम्हेसिनं दर्ता याये धुंकूगु दु । व ल्याः अझ थहां हे वनाच्वंगु दु । ज्याझ्वःया दिनय् जक झायादीपिं पाहांलिसे यानाः प्यसःनिसें न्यासःतक थ्यनीगु अनुमान दु ।

 

  • उलिमछिया ल्याखय् सहभागिता दइबलय् व्यवस्थापन यायेत थाकुइ मखुला ?

अवश्य नं थाकु । थुकिया लागि थुगु मुँज्याया कजि दयारत्न शाक्य, ल्यू कजि सिजन श्रेष्ठपिन्सं यक्व न्ह्यःनिसें बांलाक व्यवस्थापन याना च्वनादीगु दु । मुँज्याय् झाइपिं दक्वं पाहांपिं पिनें झाइगु मखु । थ्व ज्याझ्वः जुइगु थाय् बाल्टिमोर खः । अनं सतीगु थाय्‌त मेरीलाय्‌न्ड, भर्जिनिया, वासिङ्टन डिसि आदि थासं नं सहभागि जूवइपिं यक्व दु ।

अमेरीकाय् दुने हे मेमेगु थासं नं मनूत वइपिं दु । स्थानीय सहभागीया लागि च्वनेगु नयेगुया व्यवस्था यायेत तुलनात्मक रुपं अःपुइ । ग्वसाः खलःया इनापय् ज्याझ्वः यायेगु होटेल च्वनेगु लागि सहुलियत दरं क्वथा उपलव्ध यायेगु ज्या जूगु दु । छवाः न्ह्यःहे उगु होटलया दक्वं क्वथा बुक जुइधुंकूगु दु ।

 

  • आर्थिक पक्षया ल्याखं ला खर्चं यक्व हे जुइ जुइनि, गुकथं व्यवस्थापन यानादी त्यना ?

पक्कां हे खः । थ्व ज्याझ्वलय् खर्च ला यक्व हे जुइ । नेपाल अले मेमेगु देशं वइपिं पाहांपिन्सं वयेवनेया टिकटलिसें नयेगु, च्वनेगुया व्यवस्था थम्हं हे यायेत इनाप याःगु कारण नं थ्व हे खः ।

उकिया लिसें लुमन्ति पौ पिथनेत्यंगु दु । उकी हे विज्ञापन अले प्रायोजनया माध्यमं नं आर्थिक व्यवस्थापनया कुतः जुयाच्वंगु दु । नापं सुनां डोनेसन बी चाहे जूसा व नं कायेगु जुइ । अले ब्वतिमिपिनिपाखें दर्ता शुल्क नं तयातइगु दु । नेपालं झाइपिन्त २५ डलर अले मेथासं झाइपिन्त ५० डलर दर्ता शुल्क क्वःछनातयागु दु ।

Views: 180

Comments