जि नेवाः ख्यलं तापानागु मदु – आशिष्मा नकःमि

जि नेवाः ख्यलं तापानागु मदु – आशिष्मा नकःमि

   ने. स. ११३७ कौलागा नवमि          बिराजकाजी राजोपाध्याय

नेपालभाषाया संकिपा न्याल्ल ब्यांपाखें थःगु फिल्मि करिअर न्ह्याकादीम्ह हिरोइन मय्जु आशिष्मा नकःमि थौंकन्हय् कलिउड धयातःगु खस नेपाली भाषाया संकिपा ख्यलय् नं अतिकं लोकं व्हाः । अझ वय्कःयात थौंकन्हय् ला वय्कःया नामं स्वयां फिगर कोकाकोला धकाः हे म्हस्यू । वय्कः मय्जु थौंकन्हय् छु यानाच्वना दिल ले सा ? नेवाः दबूलिसे वय्कः फिगर कोकाकोला मय्जु आशिष्मा नकःमिलिसे जूगु खँल्हाबल्हा थन न्ह्यब्वयाच्वना ।
१. छिं म्हितादीगु संकिपा अधकट्टिया फिगर कोकाकोला म्ये अतिकं लोकंव्हात । थुगु म्ये व संकिपा धुंकाः छिगु फिल्मि करीअरय् गुलित ह्यूपाः वःगु दु ?
थुगु संकिपा धुंकाः जिगु फिल्मि करीअरय् तःधंगु हे ह्यूपाः वःगु दु । जिं आः न्हूगु निगू संकिपा साइन हे यायेधुनागु दु । मेगु निगू संकिपाया स्क्रीप्ट ब्वनाच्वनागु दु । मेरो फिगर कोकाकोला जिगु निम्तिं तःधंगु हे प्लस प्वाइन्ट जूगु दु धायेमाः ।

२. थुगु म्येपाखें छिगु थुकथंया हे आशा दुगु खःकि आशा स्वयां आपाः हे दत ?
छगू खँ ला छु धायेबलय् जिं उलि आशा हे तयेगु मयाना । छाय्धाःसा गन आशा दइ, अन निराशा नं दयाच्वनी । आशा यातकि हे निराश जुइमालीगु खः । अय्जूगुलिं जिं गबलें नं आशा तयेगु मयाना ।
थुगु म्ये न्यनाबलय् जिं म्ये क्याच्ची जू ला धयागु खः । अले थ्व म्ये हिट जुइ धकाः नं बिचाः यानागु खः । तर थपाय्सकं थ्यंक जुइ धयागु ला बिचाः हे मयानागु धाःसा खः ।

३. गुलिसिनं आशिष्मा खस फिल्मय् डिमान्ड दयाः नेवाः फिल्मलिसे तापाना वन धकाः धयाच्वंपिं न दु नि ।
दयेत ला दु । तर अथे धाइपिन्त न्यनेमाःगु छता खँ थ्व नं खः कि नेवाः फिल्म गुलि दयेकाच्वंगु दु ले ? थन नेवाः फिल्मत नं गाक्क हे पिहां वयाः, जितः फिल्म म्हितेत अफर यानाः नं जिं मम्हितागु खःसा थथे धायेगु पाय्छि खः । तर फिल्म नं उलि दयेकाच्वंगु मदु, अले दयेकाच्वंगुली नं जितः धाःमवः । थज्याःगु अवस्थाय् जि नेवाः फिल्मलिसे तापात धाये मिले मजू थें च्वं ।
अझ धायेगु खःसा आः जि खस भाषाया फिल्म म्हिताः नं जि नेवाः फिल्मलिसे सतिना हे च्वनागु दनि । अधकट्टिया म्ये जिगु फिगर कोकाकोला म्ये नं दयेका । बाटो मुनिको फूल–२ संकिपाय् नं जि नेवाः म्ह्याय्मचा जुयाः हे म्हिताच्वनागु खः अले थुकी जिगु गुलि डायलग नेवाः भाषं हे दु । अझ मेगु खँ थुगु न्हू दँय् जिं नेवाः कला ख्यःया नितिं छगू देछा नं बियागु दु ।

४. छिगु पारीवारीक पृष्ठभूमि ला संगीत क्षेत्र खः । तर छि छम्ह अभिनय अथवा फिल्म क्षेत्रय् लाःवल, गुकथं ?
जि संगीत क्षेत्रय् मदु नं गथे धायेगु ? संगीत धायेबलय् उकी हुलाप्याखं, गायन व बादन खः । हुलाप्याखं धायेबलय् उकी अभिनय ला द हे दइनि । जि प्याखं नं हुला । प्याखं हुलेबलय् अभिनय याये हे माल । अले आः जिं फिल्मय् अभिनय याना हे च्वनागु दु । व ल्याखं जि संगीत क्षेत्रय् ला अभिनय यायां नं दुगु हे खत । व लिसें जिं म्ये नं हाला हे च्वनागु दु ।

५. नेवाः दबूया ब्वँमि भाजुमय्जुपिनिगु नितिं छिगु छु हसना दु ले ?
दक्कले न्हापां ला जि नेवाः ख्यलं तापात धकाः तायेकादीपिन्सं अथे बिचाः मयात इनाप यानाच्वना । जि नेवाः ख्यलं तापानागु मदु । जिं न्हाचः नं धायेधुन, खस संकिपापाखें नं जि नेवाः ख्यःयात निरन्तरता बियाच्वनागु दु । मेगु छता खँ, जिं न्हापा नं धया, आः नं धाये नेवाः भाय् व खय् भाय्या संकिपाय् जिं ल्ययेमाल धाःसा जिं प्राथमिकता नेवाः भाय्यात हे बी । उकिया लिसें जिं अकुन्हु तिनि बेल्जियम वनावया । बेल्जियमय् नं अले देशं पिने मेमेथाय् वनाबलय् नं जिं अन नेवाः भाय्या फिल्मया बजार विस्तार यायेगु कुतः यानाच्वनागु दु । थुकथं जिं नेवाः फिल्मया नितिं थम्हं खं थे, फु थे पलाः न्ह्याकाच्वनागु दु । लिसें जितः नेवाः स्वकुमि भाजुमय्जुपिन्सं गुकथं नेवाः संकिपा ख्यलय् माया यानादिल, खस संकिपा ख्यलय् नं तिबः बियादिइत इनाप यानाच्वना ।

Views: 31