नेवाः फिल्म नखः व हना ज्याझ्वः जुइगु

नेवाः फिल्म नखः व हना ज्याझ्वः जुइगु

   ने. सं. ११३७ दिल्लागा तृतिया          विजयरत्न

नेवाः फिल्म सोसाइटीया ग्वसालय् थुगुसी निक्वःगु नेवाः संकिपा नखः व नेवाः संकिपाकःमि हना ज्याझ्वः जुइगु जूगु दु ।

थगुने न्हापांखुसि धरानय् न्हापांगु नेवाः संकिपा नखः व हना ज्याझ्वः जूगु खःसा थुगुसी निक्वःगु संकिपा नखः व हना ज्याझ्वः येँय् जुइत्यंगु खँ नेवाः फिल्म सोसाइटीं जानकारी ब्यूगु दु ।

थुगुसी ने.सं. ११३७ कौलाथ्व ३ (असोज ७ गते) जुइगु ज्याझ्वलय् नेवाः संकिपायात सिरपाः व संकिपाकःमिपिन्त हनीगु खँ दुसा थुगुसी संकिपा दथुइ धेंधेंबल्ला यानाः बांलाःगु संकिपायात सिरपाः बिइगु ग्वसाः ग्वयातःगु दु ।

अथे जूगुलिं थ्व संकिपा नखलय् थःगु संकिपा दुतिनेत इनाप नं याःगु दु । ब्वति कायेगु नितिं थ्वहे वइगु ने.सं. ११३७ गुंलागा ९ (श्रावण मसान्त) या दुने नेवाः फिल्म सोसाइटीया दांभरी विजेन्द्र बज्राचार्यया इमेज डस सिक्स कलर ल्यावय् स्वापू तयेत नं इनाप याःगु दु ।

नेवाः संकिपा ख्यलय् महोत्सव व सिरपाः ज्याझ्वः ताःई न्हयवःनिसें दिनाच्वंगु अवस्थाय् नेवाः फिल्म सोसाइटीपाखें यायेत्यंगु थ्व ज्याझ्वःयात कयाः आपासिनं लसता प्वंकूगु दुसा थुगुसी पेजथ्री पिपुल्स च्वाइस अवार्डया स्वक्वःगु संस्करण नं जुइत्यंगु दु । थुकियात नं आपासिनं लसकुस याःगु दु ।

आःतक सीदु कथं पेजथ्री पिपुल्स च्वाइस अवार्ड थ्वहे वइगु ञलाथ्व ५ (भदौ १० गते) शनिवाः जुइगु खँ दुसा मच्छिन्द्र क्लबया ग्वसालय् येँया जनबहालय् जुयाः वयाच्वंगु नेवाः संकिपा नखः नं छुं छुं हुनिं थगुने मजूसां थुगुसी जुइगु सम्भावना दूगु खँया नं हुइनाभुइना दु ।

थुकथं थुगुसी नेवाः संकिपा नखः व सिरपाःया ख्यलय् छगू मखु तःगु हे लसता ज्याझ्वः जुइगु सम्भावना ब्वलना वःगु दु ।

Views: 6