नेवाः एफएम आः अनक मिडिया प्रा.लिं न्ह्याकीगु

नेवाः एफएम आः अनक मिडिया प्रा.लिं न्ह्याकीगु

   ने. सं. ११३७ दिल्लागा तृतिया          ललेन्द्र शाक्य

थनि १०–११ दँ न्ह्यःनिसें न्ह्याःगु नेपालभाषा एकेदेमिया नेवाः एफएम १०६.६ मेगाहर्ज आः अनक मिडिया प्रा.लिं न्ह्याकीगु जूगु दु ।

न्हूगु ब्यवस्थापन व न्हूगु पहलं न्ह्याकेगु तातुनाः नेपालभाषा एकेदेमिया नितिं अनक मिडिया प्रा.लिं नेवाः एफएम न्ह्याकेत्यंगु खः ।

थ्वहे झ्वलय् थौं ने.सं. ११३७ दिल्लागा तृतिया (असार २८ गते) बुधवाः थुगु एफएम संचालन यायेगु नितिं किपूया थीथी ख्यःया संचारमाध्यमया संचारकःमिलिसें भाषासेवीलिसें नेवाः एफएम न्ह्याकाः वयाच्वंपिनिगु दथुइ छगू सहलह मुँज्या जूगु खः ।

अनक मिडिया प्रा.लि.या म्यानेजिङ डिरेक्टर नविन महर्जनया सभानायःसुइ न्ह्याःगु उगु सहलह मुँज्याय् संचारकःमि श्रीकृष्ण महर्जनं नेवाः एफएम १०६.६ मेगाहर्ज न्ह्याकेमाःगु विषयस लिसें आः न्हूकथं न्हूगु व्यवस्थापनं गुकथं न्ह्याकेगु जुइ धैगु विषयस ध्वाथुइकाः दीगु खः ।

अथेहे, संचारकःमि नजरराम महर्जनं नेवाः एफएमया विषयस नेपालभाषा एकेदेमिलिसे जूगु खँया जानकारीलिसें अनक मिडियाया नविन महर्जनलिसे जूगु खँपाखें न्हूगु व्यवस्थापनं आः उगु नेवाः एफएम न्ह्याकेगु विषयस जानकारी बियादीगु खः ।

ज्याझ्वलय् किपूया नेपालभाषा सेवीपिं प्रा.डा. तुयूबहादुर महर्जन व नेपालभाषा क्षेत्रया अनुसन्धानकर्ता प्रयागमान सिं प्रधानलिसें भाषासेवी बुद्धिलाल ज्यापुपिनिगु उपस्थित दूगु खःसा संगीतकःमि गुज्ये मालाकार, संचारकःमि नविन जोशी, ज्ञानबहादुर महर्जन नेवाः, ओमकृष्ण ताम्राकारलिसें थीथी संचार ख्यःया व्यक्तिपिनिगु उपस्थिति दूगु खःसा टेक्निसियन शान्तराज शाक्यया नं उपस्थिति दूगु खः ।

रामभोला महर्जनं न्ह्याकादीगु उगु ज्याझ्वलय् टेक्निसियन शान्तराज शाक्यं म्हिगः व थौं नेपालभाषा एफएम १०६.६ मेगाहर्जया स्थितिया विषयस ध्वाथुइकादीगु खः ।

किपू नगरपालिका २ वडा द्यःध्वाखा त्वालय् च्वंगु न्याम्हासिमाया नेपालभाषा एकेदेमिया बैठक हलय् जूगु उगु सहलह ज्याझ्वलय् अनक मिडिया प्रा.लि.या म्यानेजिङ डिरेक्टर नविन महर्जनं आः नेवाः एफ.एम. संचालन यायेत्यनागु उद्देश्ययात ध्वाथुइकादिसें अनक मिडियां नाफामूलक कथं मन्ह्याकुसे समावेशी कथं न्ह्याकेगु जानकारी बियादिलसा वय्कलं अनक मिडियाया श्लोगान हे ‘मिडिया फर सोसिअल गुड’ धकाः तयागु खँ नं कनादिल ।

वय्कलं एफएम संचालनया नितिं आर्थिक व्यवस्था मदयेकं मगाःगु खँ न्ह्यथनादिसें नेवाः एफएमं आः पारिश्रमिक बियाः हे न्ह्याकेगु बचं नं बियादीगु खः ।

नेवाः एफएम १०६.६ मेगाहर्जया प्रसारण वंगु २०७२ बैशाख १२ गतेया भुखाय् लिपा एफएम स्टुडियो स्यंगुलिं दिनाच्वंगु खःसा आः वयाः हाकनं न्हूगु व्यवस्थापनं संचालन यायेगु नितिं नेपालभाषा एकेदेमिया नितिं अनक मिडिया प्रा.लिं भाला कुब्यूगु खः ।

नेपालभाषा एकेदेमि किपूया गालय् लाःगु थाय् जूगुलिं प्रसारणया झ्वलय् गनं तायेदइगु व गनं मदइगु जुइगु समस्या ब्वलनाच्वंगुलिं आः नेवाः एफएमया नितिं टावर किपू नगरय् च्वय् लाःगु थाय् द्यःध्वाखाय् निर्माण ज्या क्वचायेधुंकूगु दुसा नेपालभाषा एकेदेमिया भवनय् न टावर दयेके ज्या जुयाच्वंगु दु । थ्व ल्याखं नेवाः एफएम १०६.६ मेगाहर्जया निगू टावर दइगु जूगु दु ।

आः याकनं हे संचालन जुइत्यंगु उगु नेवाः एफएम न्हिच्छि चच्छि हे प्रसारण जुइगु जानकारी नं ब्यूगु दुसा न्हापां सुथय् ६ निसें ९ ता ईतक व न्हिनय् २ ता ईनिसें ५ ता ईतक जक न्ह्यानाच्वंगु खःसा न्हिनय् प्रसारण बन्द जुइगु जुयाच्वंगु खः ।

थथे नेवाः एफएम १०६.६ मेगाहर्ज हाकनं संचालनय् वयेत्यंगुलिं सचेत नेवाः ख्यःया व्यक्तित्वपिं तसकं लयेताःगु दु ।

ज्याझ्वलय् उपस्थित सकलसिनं नेवाः एफएमयात निरन्तरता बिइगु नितिं थःपिनिगु पाखें फक्व ग्वाहालि यायेगु बचं नं ब्यूगु दु ।

ज्याझ्वलय् नेवाः एफएमय् ज्याझ्वः न्ह्याकामिलिसें संगीतकःमि व खेलकुद पत्रकार किपूया नविन महर्जन छुं दिं न्ह्यः मदूगुलिं वय्कःया लुमन्तिइ छगू मिनेट मौनधारण नं याःगु खः ।

किपाः अनिल महर्जन, ल्वहँदेगः, किपू–१०

Views: 7