कुरुवालय् वनाः दिलद्यः काःवनीगु (मीना बज्राचार्यया च्वसू)

कुरुवालय् वनाः दिलद्यः काःवनीगु (मीना बज्राचार्यया च्वसू)

   ने. स. ११३७          मीना बज्राचार्य

बुंगःद्यः काःवनेत कुरुवालय् वनेमाः धइगु आपासिनं स्यू हे जुइमाः । बुंगद्यःयात दच्छिइ निक्वः कुरुवालय् वनाः काःवनेगु चलन दु धइगु खँ धाःसा आपासिनं मस्यू जुइमाः ।

छक्वः बैशाख महिनाया अमाइ कुन्हू रथय् तयेत व निक्वःगुखुसि दिल्लागाः अमाइ कुन्हू काःवनीगु खः । थुगुसी असार १० गते शनिवाः अमाइ कुन्हू बुंगद्यःयात कुरुवालय् वनाः काःवनीगु जूगु दु । कुरुवालय् वनाः बुंगद्यःयात कलशय् तयाः पाञ्जु व मलिनीपिन्सं ज्वनाः बुंगय् च्वंगु द्यःगलय् ज्वनावइगु खः ।

नगुने २०७२ सालया बैशाख १२ गते बुंगद्यःया देगः पूर्णरुपं क्षति जूगुलिं बुंगद्यःयात बुंगय् च्वंगु फल्चाय् बिराजमान याकातःगु दु । थुगुसी बुंगद्यः कुरुवालय् मलिनी जुयाः झाइम्ह मलि परिवारया भौमचा रेणु मलि धइगु खँ मलि परिवारं जानकारी ब्युगु दु । थ्व मली परिवार बुंगःद्यः हःबलेया ललित ज्यापुया सन्तति खः ।

बुंगद्यः नेपालमण्डलय् बिज्याये धुंका नं वसपोलयात छुं छुं खँ चित्तबुझे मजुगुलिं तंम्वयाः लिहाँ बिज्यागु बखतय् थथे वना हाकनं वसपोल करुणामययात ह्ययेकाः लितब्वना हःगु धइगु धापू दु । थुकथं बुंगद्यःयात कुरुवालं दच्छिइ निक्वः काःवनेमाःगु परम्परा न्ह्याःगु खः ।

वैशाखया अमाइ कुन्हु बुंगद्यः रथय् तये न्ह्यः कुरुवालय् वनाः बुंगद्यःयात कलशय् तयाः हइगु खःसा असारया अमाइ बलय् छक्वः नं कुरुवालय् वनाः बुंगःद्यः काःवनीगु परम्परा न्ह्यानाः वयाच्वंगु दु । थथे दिल्लां कुरुवालय् वनाः बुंगद्यः काःवनेगुयात धाःसा दिल्लाद्यः (दिलद्यः) काःवनीगु धकाः धाइ ।

रथय् बिज्याके न्ह्यः बैशाखं व असार महिनाय् दिल्लाचःह्रे धुंकाः वइगु अमाइ कुन्हु नापं यानाः दँय् निक्वः कुरुवालय् तक न्यासी हे वनाः बुंगद्यः काःवनेमाःगु परम्परा थौंतक नं न्ह्याना हे च्वंगु दु ।

बुंगःद्यः देगलय् जुइबलय् बुंगद्यःया देगः दुने हे वनाः कलश ज्वना वइम्ह मलीं पुजा याना कुरुवाःपाखे स्वयावनीगु खः ।

थुगुसिया असार १० गते शनिवाः कुरुवालय् दिलद्यः काःवनीगु खः । द्यः रथय् बिज्याना च्वनिबलय् रथय् हे द्यःया पालि क्वतः हया कलशय् तयाः द्यः ज्वना वइम्ह मलिनि नं पुज्याना तिनी कुरुवालय् वनीगु खः ।

बुंगय् वनाः बुंगद्यःया देगलय् दुने वनाः हे वखुन्हु कलश ज्वना वइम्ह मलिनीयात पुज्याके बिइगु खः । मेमेबलय् धाःसा मिसापिं बुंगद्यःथाय् दुहाँ वनेमज्यु । थगुने द्यः रथय् लानाच्वंगु खःसा थुगुसिइ धाःसा द्यः बुंगय् थ्यने धुंकुगु दु ।

थथे द्यः काःवनीगु पुचलय् छम्ह गुरुजु, छम्ह द्यः पाःलाःम्ह पाञ्जु, छम्ह मलि, छम्ह सुवाः व छम्ह जय्मां नापं यानाः मुकं न्याम्ह वनीगु चलन दु । थथे बुंगःद्यः काःवनीगु पुचलय् लाःपिं न्याम्हेसिनं न्यान्हु न्ह्यःनिसें नीसी यानाः न्यान्हुतक अप्सं च्वनालि थःयात शुद्ध यायेमाः ।

थ्व पुचः अमाइ कुन्हू कुरुवाःपाखे वनाः बासं च्वनीसा कन्हय् कुन्हु पारुया दिं तान्त्रिक विधि कथं गुभाजुं पुजा यानाः कलशय् द्यः बिज्याकाः बुंगःद्यः दुथाय् लिहाँ वइ ।

अमाइ कुन्हु कुरुवालय् चाः च्वनाः कन्हय् कुन्हु सुथ न्हापां गुरुजुं तन्त्र साधना यानाः बुंगद्यःयात साली । बुंगद्यः भम्वःया रुप कयाः कलशय् दुहाँ वनेवं कलशय् किसलीं त्वपुया हइगु खः ।

थौंकन्हे धाःसा भम्वःया प्रतिक कथं पाञ्जुं मन्त्र ब्वना शंखय् दाफास्वां तया कुरुवालय् च्वंगु खुसीइ तइ । अले वहे दाफास्वां पाञ्जु व मलीनीपिन्सं कलशय् लानाः हइगु खः ।

भम्वःयात कलशय् तया काःबाजं पुयाः नेपालमण्डलय् हयाच्वंगु बखतय् बुंगद्यःया मां–अबु लाखे लसिंतय्सं सिइका लिना हःगुलिं इमिसं खनी धकाः बन्धुदत्त बज्राचार्यं तन्त्र विद्यां साधना याना ललित ज्यापूया म्ह्याय् मचाया प्वाथय् भम्वः दुगु कलश तया जनिखं हिनाब्युगु जुल । ललित ज्यापुया म्ह्याय् प्वाथय् दुम्ह धकाः लाखे लसिंतय्गु मिखा छलेयाःगु खः । अथे नं पत्याः मजुया लाखे लसिंतय्सं गुरुजुं ज्वनावःगु कलश उला स्वःवःबले भम्वः कलशय् दइमखु । तन्त्र विद्यां निपूणम्ह बन्धुदत्त गुरुजुं थ्व खँ सिया हे तन्त्रं साधना याना न्हापा हे मलीनीया प्वाथय् भम्वः दुगु कलश तयाब्युगु खः । उकिं गुरुजुं ज्वनावःगु कलशय् लाखे लसिंतय्सं स्वःगु बखतय् भम्वः मखंगु खः । थुकथं थौंतक्क नं कुरुवालय् वनाः बुंगद्यः काःवनीबलय् पाञ्जुं छगः व ललित ज्यापुया म्ह्याय् मचा वा भौमचा(मलीनी) नं कलश प्वाथय् तया जनिखं चिनाः हयेमाःगु परम्परा न्ह्यानाच्वंगु खः ।

कुरुवालं बुंगद्यः हयाच्वनिबलय् चुनिख्यः थ्यने न्ह्यः सीकांबाजं पुइगु चलन थौंतक्क नं दु । छाय् धाःसा काःबाजं पुयाः बुंगद्यः हयाच्वंगुलिं लाखे लसिंतय्सं सिइका लिना हःगुलिं सीम्हं हःगुथें यानाः सीकांबाजं पुगु जुयाच्वन । सीकांबाजं पूगुलिं सीम्ह हःगु धकाः लिना हःया च्वंपिं बुंगद्यःया मांअबु व लाखे लसिंत लिहाँ वंगु धइगु नं धापू दु । 

 

परापूर्वकालंनिसें वय्कःपिनि म्ह्याय् मचा वा भौमचा कुरुवालय् वनाः बुंगद्यः कलशय् तयाहयेगु परम्परा न्ह्यानाच्वंगु खः । बुंगद्यः काःवनेत नियम पालना यायेमाःगु जुयाः मली परिवारया म्ह्याय् मस्तय्त बुसांनिसें खाया ला–खेँय् मनकूसे बारे याका तइ ।

अथेहे मली परिवारय् इहिपा यानाः दुहाँ वइम्ह भौमचा (कलश ज्वनीम्ह मलीं) नं बुंगद्यः काःवने न्ह्यः न्हापां देखा (दिक्षा) कया नियम पालना यायेमाः । अथे धइगु देखा कायेधुंकाः खाःया ला, खेँ नयेमज्यु । तर अनहे कुलया म्ह्याय् मचां धाःसा दिक्षा कायेम्वाःगु चलन दु ।

कुरुवालय् वनाः बुंगद्यः काःवनीगु न्यान्हु न्ह्यःनिसें अप्सं च्वनेमाः । कुरुवालय् द्यः काःवनीबलय् लाकां मन्ह्याःसे न्यासि हे वनीगु खः । कुरुवालंनिसें न्यासे वयेबलय् म्होतिं नं खुघौ बिइ धकाः नं अनु मलीजुं कनादिल ।

बुंगद्यः अर्थात दिलद्यः कलशय् तयाः कुरुवालंनिसें हइ । रथय् बुंगद्यः बिज्याइबलय् रथ गन दु अनतक हइ धाःसा रथय् बिमज्याइबलय् बुंगद्यःया देगलय् तक कलश ज्वना वनेमाः । कुरुवालं कलश ज्वना वयेन्ह्यः अप्सं च्वना च्वंपिन्त ताय्, धौ व केरा तयाः चिपं थिइकाः कुरुवालंनिसें काःबाजं पुयाः न्यासि हे वइगु खः ।

दिलद्यः हयेधुंका बुंगद्यःयाथाय् कलश ज्वनावःपिं पाञ्जु व मलिनियात थकाली नकिं जूम्हं ताःचां साला लसकुस याना दुकाइ । अले पाञ्जुं प्वाथय् तयाः ज्वना वःगु कलश व मलिनी नं प्वाथय् तयाःहःगु कलश निगलं पुजा यानाः लसकुस यानाः बुंगद्यःयाथाय् दुतः यंकी । बुंगद्यःया न्ह्यःने बज्रय् पाञ्जु व मलिनि जवं खवं च्वनाः कलशया लः हायेकी । द्यः रथय् दइबलय् जूसा यदि मली परिवारया म्ह्याय् मचां कलश ज्वना वःसा वखुन्हु रथय् च्वय् हे वनाः कलशया लः हायेके बी । तर भौमचां कलश ज्वना वइबलय् धाःसा रथय् च्वय् वनेमज्यूगु नियम दु ।

बुंगद्यःया घःमा–कर्कोटक नागराजयात मिसातय्सं न्हुइमज्यू धइगु नियम दु । तर म्ह्याय् मचायात धाःसा काय्मचा सरह हे कलश ज्वना वइबलय् दर्जा बिया रथय् च्वय् हे वंकेबी ।

कुरुवालं ज्वनावःगु कलशया लः बज्रय् हायेके धुंकाः बुंगद्यःया ज्वलान्हाय्कं क्यनी । अले बुंगद्यःयात स्वचाः चाहिली । वयांलिपा बुंगद्यःया न्ह्यःने च्वना गुरुजुं जज्ञशाला दयेकाः होम याना पुज्याइ । कुरुवालय् वंपिं न्याम्हेसिनं नं होम याःथाय् कीगः तिना पुज्याइ । पुजा क्वचायेका तिनि अप्सं च्वनाच्वंपिन्त भ्वय् नकी ।

सुनिल मलीं जानकारी ब्युकथं बुंगद्यः देगलय् हे च्वनिबलय् पाञ्जुपिन्सं पुजा ज्वलं तया न्हिंयान्हिथं सुथय् नित्यपुजा याइगु खःसा बुंगद्यः रथय् च्वना बिज्याइबलय् धाःसा न्हिंयान्हिथं सुथय् नित्यपुजा यायेत पुजा ज्वलं मली परिवारं हे यंकेमाः ।

बुंगद्यःया रथ गन गन थ्यनी अन अन हे वनाः न्हिंयान्हिथं मली परिवारया छेंथासं हे खाली तुतिं (लाकां मन्ह्याःसे) हे न्यासि वनाः पुजा ज्वलं ज्वनाः नित्यपुजा याःवनेमाः ।

Views: 0