थौं योगवीरसिंया बुदिं

थौं योगवीरसिंया बुदिं

   ने. स. ११३६ बछलाथ्व दुतिया          नेवाः दबू सम्वाद्दाता

नेपालभाषाया प्यंगः थां मध्येयाम्ह छम्ह धयातःम्ह कवि योगवीरसिं कसाःया थौं १३०दँया बुदिं खः ।

नेपालभाषा साहित्य ख्यलय् तःधंगु योगदान दुम्ह कसाःया जन्म थौंया हे दिनय् ने.सं.१००६स मां लक्ष्मीनानी व अबुजु चैत्यवीरसिंया कोखं येँया क्वाछेँ त्वालय् जूगु खः ।

राणाकालय् नेपालभासं च्वयेगु ब्वनेगुलिइ प्रतिवन्ध दुगु इलय् नेपालभासा साहित्यय् च्वसा न्ह्याकाद्यूम्ह वयकः पेशाया ल्याखं कापः बन्जाः खः । थःगु इलय् वयकलं थःगु कापः पसलय् हे नेपालभाषाया साहित्य गोष्ठिया ग्वसाः ग्वयेगु नं यानाद्यू ।

उगु इलय् तुलसीमेहरया चर्खा प्रचार आन्दोलन, लाइब्रेरी स्थापना, माधवराजया आर्यसमाज प्रचार आन्दोलन आदिइ नं वयकः सक्रिय रुपं न्ह्यज्यानादीगु खः । थज्याःगु ज्याखँय् जूगु द्वपनय् वयकलं तत्कालीन राणा शासकतपाखें यक्व हे यातना नं फयेमाःगु खः ।

नेपालभासं च्वःगु, सामाजिक ज्याखँय् जूगु हुनिं हे जेल यातना फयेमाःम्ह न्हापांम्ह नेवाः थ्वयकः कसाः ने.सं. १०६२स मदुगु खः ।

नेपालभाषा साहित्य ख्यःया थपूया नितिं तन, मन, धनं तकं थःत पानावंम्ह कसाःया बुदिंया थौं नेवाः ख्यलय् छुं हे ज्याझ्वः मदुगु खँय् धाःसा नेवाः साहित्य प्रेमीपिन्सं कुंख्युंगु दु ।

Views: 21

Comments