भ्यालेन्टाइन डे म्हसिइके

भ्यालेन्टाइन डे म्हसिइके

   ने. स. ११३६ सिल्लाथ्व तृतीया          रोसन श्रेष्ठ

थ्व वाः भ्यालेन्टाइन डे या वाः । दक्व ल्यायम्ह ल्यासेपिं भ्यालेन्टाइन डे या फसं कयाः वँय् जुइगु वाः । तर ल्यायम्ह ल्यासे पासापिन्सं थुइका दिसँ ‘भ्यालेन्टाइन डे वास्तवय् यःत्यःयात हनेगु दिं मखु । भ्यालेन्टाइन डे हनेगु जूसा यःत्यः जूम्हनाप इहिपा यानाः हनेमाः ।

सन्त भ्यालेन्टाइनं थःगु चर्चय् यःत्यः जूपिंन्त इहिपा यानाबिइगु खः । यूरोपय् यःत्यः यानाः इहिपा मयासें लाःलाःथे मचा बुइका जुइगु व अथे जुयाः अबु म्हमस्यूपिं मचाखाचापिं दयेका जुइगु परम्परा सामान्य खः । अजाःगु परम्पराया विरोध यासें यःत्यः जूम्ह नाप इहिपा यानाः सेल्लागु छेँ (स्थीर परीवार) दयेकेमाः धयागु दर्शनयात सन्त भ्यालेन्टाइनं प्रचार यानाजूगु खः । तर व दर्शन स्वंगूगु शताव्दीया समाज व शासकपिन्त मयल । अले सन्त भ्यालेन्टाइन नं शहिद जुइमाल ।

भ्यालेन्टाइन डे धकाः १८गूगु शताव्दी तक सुनां नं हनेगु मयाः । १६गूगु शताव्दी पाखे ला भ्यालेन्टाइनया नां सन्तया धलखं हे लिकानाछ्वःगु खः । ‘यःत्यः याःम्ह नाप हे इहिपा यायेमाः धाइम्ह, थजाःम्ह मूर्ख मनू नं चर्चया पादरी, सन्त जुइ फइला ?’ अबलयया समाजं थथे तायेकीगु खः ।

लिपा १८गूगु शताव्दीपाखे पुलांगु नखःचखःयात विस्थापित यायेगु झ्वलय् फेब्रुअरीया दथ्वी लाइगु ल्यूपरसालिया नखः (प्राग रोमन इलंनिसें यूरोपय् हनाच्वंगु पगान नखः) यात न्हंकाछ्वयेगु ताःतुनाः सन्त भ्यालेन्टाइनया नामय् थ्व नखः हनेगु यानाहःगु खः ।

गथे झी नेवाःतयगु यःमरि पुन्हियात खय् बर्मू सरकारं ‘किसान दिवस’ धका नां छुनाः न्हूगु नखः दयेकाः झीगु यःमरि पुन्हिया ऐतिहासिकता व सांस्कृतिक महत्व न्हंका छ्वयेगु कुतः जुयावल, अथे हे पगान नखः प्रागरोमन ल्यूपरसालिया (झी नेवाःया म्हपुजा नाप ज्वःलाःगु नखः)यात न्हंका छ्वयेत क्रिश्चियनपिन्सं भ्यालेन्टाइन डे हनेगु यानाहःगु खः ।

valentine-2

अझ विकृत खँ ला छु धाःसा झीथाय् यःम्ह भाजुमय्‌जुयात ‘छ जितः यः’ धकाः प्रस्ताव तयेगु दिंकथं भ्यालेन्टाइन डे यात हनेगु यानाच्वंगु दु । ’विल यू बि माइ भ्यालेन्टाइन ?’ धकाः धायेगु थः यःत्यः जूम्ह भाजु मय्‌जुयात ‘इहिपा यायेगु मखुला ?’ धकाः प्रस्ताव तयेगु खः, तर झीथाय् ला यःत्यः मजूपिनि दथुइ यःत्यःया नितिं प्रस्ताव तयेत ‘विल यू बि माइ भ्यालेन्टाइन ?’ धकाः धयाच्वनी ।

अथे हे इहिपा जुइधुंकुपिं त्यपुपिनि नं भ्वासि पहः क्यनाः भ्यालेन्टाइन गिफ्ट कालबिल यानाच्वनी । यःत्यः जूम्ह नाप हे इहिपा जुल धाःसा भ्यालेन्टाइनया दर्शन नालाकाःगु जुल । इहिपा जुइ धुनेवं भ्यालेन्टाइनया सन्दर्भ सिधल । यःत्यः मजुसें इहिपा जूपिं त्यपुपिनिगु नितिं भ्यालेन्टाइनया सन्दर्भ छुं हे मदु । इहिपा जूपिं त्यपुपिन्सं ‘माइ भ्यालेन्टाइन’ धकाः भ्यालेन्टाइन डे हनेगु नं भ्वासिपह क्यनाजुइगु बाहेक मेगु छुं नं मखु ।

आः थुलि खँ सिइवं छिं धयादिसँ, छि भ्यालेन्टाइन डे गुकथं हनेगु ? पगान नखःयात हेबायचबाय् यानाः भ्यालेन्टाइन डे हनेगु कि इहिपा यायेत ग्याःपिं यःत्यः यानाः मोजमस्ति याना जुइजक न्ह्याःपिं जुयाः भ्यालेन्टाइनया अपमान यायेत भ्यालेन्टाइन डे हनेगु ? छिगु विचाः………

Views: 42

Comments