पत्रकार महासंघया संस्थापक नायः श्रेष्ठ

पत्रकार महासंघया संस्थापक नायः श्रेष्ठ

   ने. स. ११३६ पोहेलागा चतुर्थि          राजेन्द्र शाक्य

rajendra-shakyaपत्रकारिता ख्यःया दक्कले तःधंगु सम्पत्ति धइगु हे वया विश्वसनीयता खः । वं पितबीगु सुचनं सत्यतथ्ययात गुलि क्वात्तुक कय्‌च्याना च्वन
धकाः स्वयेगु हे पत्रकारिता ख्यःयात लनीगु दक्कले न्हापांगु व तःधंगु दापू खः । तर नेपाःया पत्रकारतय् मंकाः संगठन नेपाल पत्रकार महासंघं हे ‘सत्य’यात सुचुकातःगु स्पष्ट जुयावसेंलि महासंघया नेतृत्वयात हे न्ह्यसः थनेमाःगु अवस्था वःगु दु ।

खँ नेपाल पत्रकार महासंघया संस्थापक सु खः धइगु बारे खः । आःतक थःगु संगठनया संस्थापककथं महासंघं सन्त नेतालिसें पुलांम्ह प्रधानमन्त्री मदुम्ह कृष्णप्रसाद भट्टराईयात हे न्ह्यथनेगु याः । थःगु भवनय् महासंघया आःतकया नायःपिनिगु किपाः झ्वः छुनातःथाय् भट्टराईया हे किपा दक्कले न्ह्यःने तयातःगु दु ।

महासंघया हे मागकथं सरकारं ‘राष्ट्रिय आम सञ्चार प्रतिष्ठान’ नीस्वंबलय् उबलेया सञ्चारमन्त्री डा. मीनेन्द्र रिजालं कृष्णप्रसाद भट्टराईया नां न्ह्यःने घाकाहल । पत्रकार महासंघ (न्हापा संघ)या संस्थापक धासें प्रतिष्ठानया नामय् थःगु पार्टीया नेताया नां घाके न्ह्यः पूर्व सञ्चारमन्त्रीं महासंघलिसे सहलह तकं मब्याकूगु खनेदत ।

सञ्चारमन्त्री जुयाः नेपाःया सञ्चार ख्यःया इतिहास बांलाक मसीकं हे रिजालं थ्व ज्या याःगु खःसा थ्व वय्‌कःया तःधंगु कमजोरी खः । तर सीकसीकं हे याःगु खःसा धाये हे माली कि वय्‌कः जातिवादी सोचं ग्रस्त जुयाः छम्ह नेवाःया इतिहास हुयाः ब्रम्हूयात न्ह्यःने हःगु खः ।

नेपालय् दक्कले न्हापां सत्यनारायण बहादुर श्रेष्ठया नेतृत्वय् २००८ सालय् ‘नेपाल पत्रकार(संघ)’ नांया पत्रकारतय्‌गु संस्था नीस्वंगु खः । पत्रकारिता ब्वनीपिन्सं थ्व खँ स्यू, छायधाःसा पत्रकारिताया हरेक विद्यार्थीं ब्वनीगु ग्रीष्मबहादुर देवकोटाया ‘नेपालको छापाखाना र पत्र–पत्रिकाको इतिहास’ सफूया पौल्याः १४९स थ्व खँ स्पष्ट कथं च्वयातःगु दु ।

satyanarayan

पत्रकार महासंघया आःया नायः डा. महेन्द्र विष्टं ला झन् थःगु विद्यावारिधिया थेसिसय् हे श्रेष्ठं संघ नीस्वंगु खँ च्वयादीगु दु । महासंघया केन्द्रीय दुजः लक्की चौधरीं तःक्वःमछि हे थ्व खँ ल्ह्वनेधुंकूसां बिष्टं व्यवहारय् धाःसा श्रेष्ठयात संस्थापककथं नालेफयाच्वंगु मदु ।

वि.सं २००९ बैशाख २८ गते आर्य समाज मन्दिर, भोताहितिइ जूगु थुगु संघया निक्वःगु सभां ‘नेपाल टुडे’या सम्पादक सत्यनारायण बहादुर श्रेष्ठयात हे सभापति ल्यल । देवकोटां थःगु सफुतिइ निगूगु कार्यकारिणी समितिया दुजःलिसें वय्‌कःपिं आवध्द पत्रिकाया नां बियादीगु दु । लिसें संघया साधारण दुजःतय्‌गु नं नां बियादीगु दु, गुकी गोविन्दभक्त जोशी, आशाराम शाक्य, रूद्रलाल मुल्मी व पूर्णकाजी लिसें मेमेपिनिगु नां वयाच्वंगु दु ।

गोविन्दभक्त जोशी व रूद्रलाल मुल्मीया बारे छुं खँ सीमदुनिसा देवकोटां पूर्णकाजी धकाः नां बियादीम्ह सम्भवतः नेपालभाषाया पत्रिका ‘थौंकन्हे’या सम्पादक पूर्णकाजी ताम्रकार जुइमाः । छाय्‌धाःसा २००९ सालपाखे ‘थौंकन्हे’ पत्रिकाया सम्पादक वय्‌कः हे खः । अथेहे, मेम्ह दुजः आशाराम शाक्य नेपालभाषाया नांदंम्ह साहित्यकार लिसें बौध्द विद्वान खः । सम्भवतः उबले वय्‌कः थः सम्पादक जुयाच्वंगु ‘पासा’ पाक्षिक पत्रिकाया प्रतिनिधित्व यासें संघया दुजः जुयादीगु जुइमाः । लुमंकेबहःजू, ‘पासा’ नेपालभाषाया न्हापांगु समाचारप्रधान पत्रिका खः ।

श्रेष्ठया नेतृत्वय् नीस्वंगु नेपाल पत्रकार संघया आज्जु खः – ‘नेपाःया पत्रकारत व नेपालं पिनेया नेपाली पत्रकारतय्‌त संगठित यानाः इमित माःगु सुविधाया नितिं कुतः यायेगु व नेपालं पिनेया पत्रकारतलिसे स्वापू तयाः नेपाःया श्रमजीवि पत्रकारतय्‌गु व समाचारपत्रतय्‌गु अधिकारया रक्षा यायेगु।’ थुकथं स्वयेबलय् पत्रकार व प्रकाशनया अधिकारया रक्षा यायेत पत्रकारतय्‌त संगठित यायेमाः धइगु बिचाः वय्‌कःयाके उबले हे दु ।

थुगु संघं ‘छापाखाना र प्रकाशन सम्बन्धी ऐन’य् दुगु स्वतन्त्र पत्रकारिताय् अंकुश तइ कथंया वाक्यांशया स्पष्ट व्याख्या यायेमाःगु माग नं उबलेया गृहसचिवयात तःगु खः । उकिया स्पष्ट व्याख्या मजूसा नेपाःया शिशु पत्रिकाया प्रगतीइ यक्व हे पंगः थनीगुलिं थुपिं दफाया स्पष्टीकरण जुइमाः धकाः २००९ फागुन २ गते माग न्ह्यब्वःगु खः ।

patrakar

वयां न्ह्यः उगु हे ऐनया विषययात कयाः गृहसचिवयात समाचारपत्रय् सम्पादकया थाय्‌बाय्‌ न्ह्यथनेमाःगु संसारय् गनं मदुगु व्यवस्था चीकेमाःगु, व्यंग्यचित्रयात नं सरकारं सहुलियत बीमाःगु, दण्ड व खुला कुनेगु थासय् दण्ड अथवा खुला कुनेगु धकाः च्वयेमाःगु, बिदाया दिनय् पर्चा वा अखबार तुरुन्त पिथनेमाःसा निगू प्रति लःल्हायेगु थाय् व अथे लःल्हाःगु निस्सा कायेगु प्रबन्ध जुइमाःगु थेंजाःगु माग न्ह्यब्वयेधुंकूगु खः ।

थुकथं संगठित रूपं पत्रकार व प्रकाशनया हकहितया नितिं पलाः न्ह्याकेधुंकूगु नेपाल पत्रकार संघ छुं दँलिपा निष्क्रिय जुल । तर विघटन जूगु मखु । लिपा वि.सं. २०१२ साल चैत १६ गते कृष्णप्रसाद उपाध्याय (भट्टराई)या नेतृत्वय् हाकनं नेपाल पत्रकार संघ नीस्वन । थुगु संघया उपसभापति फत्तेबहादुर सिंह जुयादिल । संघय् वयकलं नेपालभाषां पिदनाच्वंगु न्हिपौ ‘नेपालभाषा पत्रिका’या प्रतिनिधित्व यानादीगु खः । थ्व नं छता न्ह्यथनेबहःगु खँ खः । उबले नेपालभाषाया पत्रकारिता गुलि प्रभावशाली जू धकाः थुकिं क्यं ।

kisun

थुकथं २००८ सालंनिसें सुरु जूगु नेपाल पत्रकार संघया इतिहासयात हुयाः २०१२ सालं नीस्वंगु संघया सभापति हे संस्थापक खः धकाः छगू तःधंगु पुचलं हे बय्‌बय् यानाच्वंगु दु । खजा सन्त नेता भट्टराई नं गबलें नं थःत पत्रकार संघया संस्थापक धकाः दावी यानामदी । मेपिन्सं हे वय्‌कःयात संस्थापकया फेतां चिकूगु खः । उकिं थ्व मदुम्ह भट्टराईप्रतिया पूर्वाग्रह मखु । सुं नं व्यक्तिया कीर्ति व इतिहास हुयाछ्वये दइमखु धकाः जक धयागु खः ।

यलया नांजाःगु आदर्श विद्या मन्दिर ब्वनेकूया संस्थापक नं खःम्ह श्रेष्ठ लिपा पूर्णरूपं शिक्षा ख्यलय् सक्रिय जुयादिसेंलि पत्रकारिता ख्यलय् थम्हं तयागु कीर्तियात वय्‌कः थःम्हं हे नं उलेगु कुतः यानामदीगु खनेदु । वय्‌कः २०६० जेठ ९ गते क्यान्सर ल्वचं मदुगु खः ।

आःतक नं महासंघं थःगु वास्तविक संस्थापक सत्यनारायण बहादुर श्रेष्ठ खः धइगु ‘सत्य’यात सुचुका वयाच्वंगु दु । थ्व ‘सत्य’ छम्हेसित जक सुचुकूगु मखु, महासंघं थःगु इतिहासयात हे हुयाछ्वःगु खः । ‘सत्य’या सः सुनावने न्ह्यः हे झीसं ‘सत्य’यात न्ह्यःने हयेगु झी सकल पत्रकारतय्‌गु दायित्व नं खः ।

(ग्वाहालि  : लहना वाःपौ)

Views: 21

Comments