अपराधीलिसे ल्वायेत जितः पने फइमखु

अपराधीलिसे ल्वायेत जितः पने फइमखु

   ने. स. ११३६ थिंलागा दुतिया          बिराजकाजी राजोपाध्याय

येँ महानगरीय प्रहरी अपराध महाशाखाय् वरिष्ठ प्रहरी उपरीक्षक कथं सर्वेन्द्र खनाल झायेधुंकाः छगू लिपा मेगु धमाधम पुलांगु मुद्दात चाला वयाच्वंगु दु व उकी संलग्न मनूत नं धमाधम ज्वनाच्वंगु दु । व हे झ्वलय् कन्सल्ट्यान्सीपाखे नं मनूत ज्वंगु दुसा फुटबलय् म्याच फिक्सिङ काण्ड नं न्ह्यःने वल । छुं दिं न्ह्यः तिनि रिमोट जडान यानाः पेट्रोलय् ठगी याना वयाच्वंपिं पम्प थुवाःत ज्वनेधुंकाः थुगु हे काण्डय् आयल निगमया थानकोट डिपोया प्रमुखलिसें विज्ञान तथा प्रविधि मन्त्रालयया सह सचिवतकं ज्वन । व हे झ्वलय् सर्वेन्द्र खनाललिसे जूगु नेवाः दबूया खँल्हाबल्हा – सं.

  • वंगु छुं दिं न्ह्यः पेट्रोल ठगी कान्डय् आयल निगम थानकोट डिपोया प्रमुख लिसें गुणस्तर विभागया पूर्व महाप्रवन्धकयात तकं ज्वनादिल । आः थुगु मुद्दा गन थ्यनाच्वन ?

पेट्रोल पम्पय् निगू कथंया मेसीन फिट यानाः उपभोक्तातय्‌त ठगे यायेगु यानाच्वंगु खः । थौंकन्हय् पल्सर फिटिङ धकाः रिमोट फिट यानाः ठगी यायेगु यानाच्वन सा न्हापा गियर फिटिङ धकाः रिमोट मदुगु उपकरण जडान यानाः यक्व ई न्ह्यःनिसें हे पम्प संचालकतय्‌सं ठगी याना वयाच्वंगु खः ।

अथे ठगी यानाच्वंपिं पम्प संचालकतय्‌त जिमिसं ज्वना । उकी ७ संचालकलिसें ५ मिस्त्री यानाः १३म्हेसित मुद्दा न्ह्याका । उकी आयल निगमलिसे सेटिङ याइम्ह कर्मचारीलिसें २म्हेसित अभियुक्तया रुपय् दु । तत्कालीन नापतौल विभागया महाप्रवन्धक, आःया विज्ञान तथा प्रविधि मन्त्रालयया सहसचिव राम आधार शाह अले थानकोट डिपोया प्रमुख रविन शर्मा । इमिगु विरुद्धय् आः अदालतय् थुनछेकया मुद्दा न्ह्यानाच्वंगु दु ।

  • पम्पय् थुकथंया ठगी जुयाच्वंगु जानकारी छितः गथे वल ?

जिगु थःगु हे अनुभव नं खः । न्हापा जिं थः हे छानविन समितिया संयोजक जुयाः सीकेगु व्हःताः चूलात । पत्रपत्रिकाय् लिसें मेमेगु संचार माध्यमय् नं वया हे च्वंगु दु ।

थज्याःगु दक्वं खँ थुइके धुंकाः मिस्त्रीतय्‌त नियन्त्रणय् कया । इन्डियां वःपिं उपिं मिस्त्रीतय्‌सं छगू उपकरण जडान याःगु वापत पम्पवालातय्‌के ४०द्वः तका कयाः पल्सर फिट यानाब्यूगु खः । व हे मिस्त्रीतय्‌गु बयानया लिधंसाय् थज्याःगु खँत लिसें मेमेगु यक्व हे खँत सीदया वल ।

  • आः थुगु केसय् मिस्त्री, पम्प संचालकलिसें थानकोट डिपो प्रमुख, मन्त्रालयया सहसचिव तक्क हे थ्यन । थुगु सिखः अझं च्वय्‌तक हे थ्यूवन धाःसा कारवाहि जुइला ?

थ्व हे च्वय्‌या तगिंतक हे थ्यनेधुंकल । प्रमुख व महाप्रवन्धकतक हे थ्यनेधुंकल । थ्व छगू तःधंगु अपरेशन हे खत ।

आः सु सु गुकथं थुगु कान्डय् संलग्न दु वा दइ व ला थथे हे धाये थाकु । अथेसां थुकी अझं मेपिं सुयां नां न्ह्यःने वःसा त्वःतेगु खँ जुइमखु । सु दोषि खनेदइ, वयात कारवाहि जुयां त्वःती ।

  • थज्याःगु आपराधिक मुद्दा आदिइ मन्त्रालय् वा मन्त्रीतयगु हे दवाव, राजनैतीक दवाव वयाच्वनी । थुगु मुद्दाय् नं ला ज्वनातःपिन्त त्वःतकेत दवाव वःगु दु जुइ नि ?

आःतक जितः ला दवाव वःगु मदुनि । पिनं पिनं छु यानाच्वन जिं मस्यू । पिनं पिनं न्ह्याम्ह न्ह्याक्व तिं तिं न्हुया जु, जितः उकिया मतलब मदु । अभियुक्ततय्‌त त्वःतकेगु खँ ज्वनाः जिथाय् सुं वःगु मदुनि । व हे वल धाःसां जिगुपाखें त्वःतेगु खँ जुइ हे मखु । जि सुयां प्रभाव दवावय् लाइमखु ।

न्ह्याथेजाःगु परिस्थिती जुइमा, अपराधीलिसे ल्वायेत जितः पने फइमखु । जितः गुलिसिनं प्रधानमन्त्रीलिसे च्वनाच्वंगु फोटो क्यनाः ख्यायेत नं मस्वःगु मखु । तर थज्याःगु नाटकया न्ह्यःने जि ग्यायेमखु । न्ह्याम्हेसिया मनू जुइमा, वा न्ह्याम्ह हे जुइमा, अपराध याइम्ह मनू कानूनया दायरा दुने हे लाइ । वं याःगु अपराधया सजाय वं फये हे माः । म्वाःमदुगु दवाव, प्रभावं जिगु प्रतिवध्दताय् लिच्वः लाकीमखु ।

sarbendra-khanal

  • छि झायेधुंकुसांनिसें ह्यूपाः खनेदयाच्वंगु दु । छि विभागय् झायेधुंकाः कन्सल्ट्यान्सी, कासामि, पेट्रोल पम्पवालातय्‌त नं कारवाहि जुल । न्हापा न्हापायापिन्सं थज्याःगु विषयत वास्ता मयाःगु खः ला ?

मेमेपिनिगु खँ जिं ल्हायेमखु । न्हापा छु जुल जिं मस्यू । दक्कले तःधंगु खँ धइगु सेवाप्रति निष्ठाभाव दयेमाः । सुं नागरीक वा पुचःयात लाःगु दुःख वा स्याःचाःया नितिं जि सेवक खः धइगु भाव दःसा ज्या याये अःपुइ । उकी इमान्दारीता दयेमा । लोभं पापं ज्या जुइमखु ।

आः कन्सल्ट्यान्सीतय्‌त हे ज्वना, हुन्डिया हे खँ जुल । अथे हे म्याच फिक्सिङया मुद्दाय् कासामितय्‌त नं ज्वनागु दु । परिमाणनिसें गुणस्तरया खँय् नं ताः इलंनिसें उपभोक्तातय्‌त ठगी यानाच्वंपिं पेट्रोल पम्प संचालकनिसें डिपो प्रमुख व महाप्रवन्धक तकं हे ज्वना ।

सर्वसाधारणयात ख्यानाः नयाजूपिं गुन्डा नाइकेतय्‌त नं झीसं कारवाहि याना । अपराध याइपिं, कानूनयात हाचां गाइपिंत कारवाहि जुइमाः ।
आः ह्यूपाः खने दयाच्वंगु दु । थ्व दक्वं ज्या धइगु प्रहरीया हे खः । अपराधयात नियन्त्रण यायेत पुलिस धइम्ह पुलिस थें जुइमाल । उकिया नितिं सक्षम इमान्दार जुइमाल ।

थुलि जुल धाःसा संचार माध्यमया नं हःपाः दइ, नागरीकया नं हःपाः दइ, समाजया नं हःपाः दइ । न्ह्याथाय् वंसां इमान्दार जुयाः ज्या यायेमाल । अपराधी खनाः ग्याये मजिल । अपराधीप्रति कडा जुइ फयेकेमाल । नागरीक लिसेलिसें दयेमाल । व जुल धाःसा अपराध नियन्त्रणया ज्या याउँक यायेफइ ।

  • अपराधीप्रति कडा जुइमाल धायेबलय् थज्याःगु खँय् मानव अधिकारकःमितय्‌सं मानव अधिकारया सम्मान यायेमाः धकाः सः तल । राजनैतीक दलया नेतातय्‌सं गुन्डा नाइकेयात याःगु कारवाहिया विरोध यात नि ?

मानवयात ला मानव अधिकार दयेमाः नि । तर दानव थुज्वःगु व्यवहार याइम्हेसित मानव अधिकारया खँ ल्हाये जी ला ? वयात मन्यंसे पसः नं चायेके मबीगु, वं मधायेकं ज्या याये मदइगु, पसः पसलय् धेबा मब्युसे सामान कया यंकेगु, ल्वाभः क्यनाः धेबा म्हया जुइगु, थज्याःगु ज्या याना जुइपिनिगु अधिकारया खँ ल्हायेगु अले सर्वसाधारणया अधिकार गन वन ले ? थज्याःपिं मनूतय्‌गु पक्षय् अधिकारया खँ ल्हायेगु धइगु ख्यालि थें जक जुइ ।

Views: 40

Comments