ज्यापु महागुथिया त्यःछिंत्यः म्ये

ज्यापु महागुथिया त्यःछिंत्यः म्ये

   ने. स. ११३६ थिंलाथ्व पुन्हि          राजभाई जकःमि

त्यःछिंत्यः बकछिं त्यः
लातापाता कुलिचां जुछिं त्यः
कूछिं त्यः चकंछिं त्यः
मन ह्वयेकाः ब्यु न्ह्याक्वसां त्यः

यःमरि पुन्हीया यःमरि साःथें
सरगतय् तिमिला मुसुमुसु काःथें
पलाःपतिं चित्त सुख जुया च्वनेमा
सदांसदां छिगु धुकू जाया च्वनेमा

दां दुम्ह दां ब्यु, ज्ञां दुम्ह ज्ञां ब्यु
छुं हे मरुसा छिं सुवाः जकसां ब्यु
समाजया थथ्याःक्वथ्याः माथं वंका ब्यु
ख्वयाच्वंम्ह नेपाःमांया दुघाः लंका ब्यु

भाषा, लिपि, कलाकृति नस्वां वयेक ह्वयेके
झीगु बाजं झीगु आगं रक्षा याये फयेके
झीगु कासा ल्वसा घासा सदां ल्यंका तये
तिसा वसः, लवःकवः मायां मुंका तये

मछिं मनिं रितिथिति भिंकुभिंकुं यंके
विज्ञानया मिखा कनाः संसार खंके
झीगु गुँ हे झीगु बुँ हे झीगु सम्पत्ति
नेपाः देया गौरव स्वां झीगु संस्कृति

सतः फल्चा, ननि, त्वाः, लाय्कू देगः, बहिबाः
लायब, लाछि, हितिगाः, हिसि दुगु नेपाःगाः
चःति हायेकाः झःझः धायेक सदां समाः याये
स्वाभिमानि पुर्खापिनि मचा जुयाः म्वाये

यःमरि फ्वनाः थौं ज्यापु दिन हनाः थौं
ज्यापु महागुथि छिगु छेँक्वय् वयाच्वना थौं
छधी छप्पँ जुयाः पलाः धिसिलाक्क छी
नेवाः नुगः ब्वयाः झीपिं देय्या थुवाः ज्वी

Views: 13

Comments