जिं म्हस्यूम्ह प्रेम साय्‌मि

जिं म्हस्यूम्ह प्रेम साय्‌मि

   ने. स. ११३६ कछलागा त्रयोदशि          शरद कसाः

न्हिनसिया १ताः पाखेया ई । न्ह्याब्लें थें आशा सफूकुथिइ च्वनाः सफू ब्वनाच्वनागु । नेपाल प्रज्ञा प्रतिष्ठानं पिथंगु ‘कलाकार रचनाकार परीचय कोष’ सफुतिइ कलाकार रचनाकारपिनिगु परीचय ब्वँब्वं प्रेमबहादुर कंसाकारया परीचय ब्वने सिधल । व धुंकाः सफूया पौ पुइकाबलय् भाषिक कार्यकर्तालिसें संचारकःमि प्रेम साय्‌मि भाजुया परीचय न्ह्यःने वल ।
भाजु प्रेम साय्‌मिया परीचय ब्वने जक त्यनागु, छगू म्हमस्यूगु लाय्न्डलाइन नम्बरं जिगु मोबाइलय् फोन वल । फोन ल्ह्वना, नेवाः दबूपाखें बिराजया फोन खनी । ‘शरद दाइ, झी प्रेम दाइया बारे सि हे सिल जुइ, वय्‌कःया बारे छपु च्वसु च्वयादी ला, नेवाः दबुलिइ तयेत ?’
जि ला अजू चाल । छु धाःगु थ्व बिराजं । ‘सु प्रेम दाइ, छु जुल प्रेम दाइयात ? वय्‌कःया बारे छु च्वयेमाल ?’
‘का, शरद दाईनं मस्यूनि ला ? रेडियो नेपालय् समाचार बीम्ह प्रेम साय्‌मि का । थौं सुथय् दुर्घटनाय् लानाः प्रेम दाइ मन्त नि ।’ बिराजया थ्व खँ न्यनाः जिं ला पत्याः हे याये फुगु मखुत । जिं ग्वःकः ला मखु जुइ धया । तर बिराजं खः, समाचार नं तयेधुन, मेमेथाय् नं समाचार वयेधुंकल धाःबलय् पत्याः जुइत बाध्य हे जुल । जिगु न्ह्यःने दुगु सफुतिइ व हे प्रेम दाइ खनेदयाच्वन । सफुतिइ वय्‌कःया हे परीचय ब्वनेत्यनाबलय् वय्कः हे मदुगु खँ न्हाय्पनय् लात ।
व सफू नं जितः प्रेम दाइनं हे कया हयाब्यूगु खः । वय्‌कः आशा सफूकुथिइ झाःबलय् ‘एकेदमिं पिकाःगु कलाकार रचनाकार परीचय कोष सफू स्वयेधुन ला धकाः न्यनादिल । जिं मस्वयानि धकाः लिसः बिया । ‘का छिगु हे परीचय उकी दुथ्याकातःगु दु, छिं हे स्वया मदियानि ला ? उकी परीचय दुपिंत सफुतिइ छ्यापं नं दु । जिं हे कयाहइबिला ?’ लिपा वय्‌कलं सफू ज्वना हे झाल । वय्‌कलं हे हयाब्यूगु सफुतिइ वय्‌कःया हे म्हसिका ब्वनेत्यनाबलय् वय्‌कः मन्त धइगु बुखँ न्यनेमाल ।
प्रेम साय्‌मि, नेपालभाषा ख्यःया छम्ह सक्रिया भाषासेवी, च्वमि, कार्यकर्ता आदि कथं म्हसीका दुम्ह थौं थ्व ख्यलं मत्यवं तापात । वि.सं. २००७ माघ १५ गते मां देवमाया मानन्धर व अबु बेखानारायण मानन्धरया कोखं जन्म जुयादीम्ह वय्‌कः अध्यापन, समाचारवाचन, सम्पादन, अनुवाद, अभिनय आदि तःगू ख्यलय् सक्रिय जुयादिल । ‘मतिनाया किचलय्’ नांया न्हापां निवन्ध च्वयाः पिलूझाःम्ह वय्‌कलं ‘दोलखाया नेपालभाषा खँपु मुना, (ने.सं. ११०६)’, ‘नेवाः नां मुना (१११७÷११३४)’ सफू पिथनादीगु दु । त्रिचन्द्र कलेजं पिथनीगु ‘जः’ पत्रिका व पलिस्थां पिदनीगु ‘पलिस्था’ दँपौया सम्पादन यानादीम्ह वय्‌कलं २०३२ सालय् ‘ब्वलासा’ नाटकय् अभिनयस लियांलिउ सिरपाः त्याकादीगु खः । वय्‌कः ज्ञानमाला भजन खलः, स्वयम्भुया लिउछ्यान्जे लिसें प्रचार कजि खःसा साहित्यिक संस्था पलिस्थाया नं छ्यान्जे खः । ताः ईतक्क रेडियो नेपालया समाचारवाचन यानादीम्ह वय्‌कलं समाचार अनुवाद, सम्पादन व रिपोर्टिङ नं यायेगु यानाद्यूगु खःसा छगू इलय् वय्कलं मैत्री एफ एमय् नं नेपालभाषां समाचार बियादीगु खः । लिसें वय्‌कः केन्द्रीय मानन्धर संघं पिथनीगु ‘यःसिं’ पत्रिकाया सम्पादक नं जुयादीगु दु ।
नेपालभाषाय् स्नातकोत्तर यानादीम्ह वय्‌कः ‘पुलांगु नेपालभाषा खँग्वः धुकू’ दयेकेगु ज्याय् नं संलग्न जुयादी । थुकिया हे प्रेरणा कथं वय्कलं लिपांगु इलय् ‘अःखः खँग्वः धुकू’ पिकायेगु कुतः यानाच्वनादीगु खः । जितः गनतक्क ताः, वय्‌कःया उगु सफू तयार हे जुइ नं धुंकूगु खः । व हे सफूया ज्या झ्वलय् निन्हु स्वन्हु न्ह्यः जक आशा सफूकुथिइ झाःगु खः । उगु सफूया भूमिका च्वयेत प्रेम दाइनं तेजरत्न कंसाकारजुयात धयादीगु जुयाच्वन । प्रेम दाइनं तेज दाइयात थःगु सफूया नितिं उगु भूमिका च्वयाः आशा सफूकुथिइ हे त्वःताबिइत धयादीगु जुयाच्वन । निन्हु स्वन्हु न्ह्यः प्रेम दाइ आशा सफूकुथिइ झायाः ‘ग्व, तेजरत्न दाइ मझाः ला ?’ धकाः न्यना च्वनादीगु खः । सखे, भूमिकाया ज्या सिधःगु खःसा वय्‌कःया सफू नं पिहां वये हे धुंकल जुइ ।

Views: 112

Comments