बालाचःर्हेबलय् याइगु सर्पाहुति

बालाचःर्हेबलय् याइगु सर्पाहुति

   ने. स. ११३६ कछलागा त्रयोदशि          बिराजकाजी राजोपाध्याय

जुजु गुणकामदेवं कलिगत सम्वत् ३८२५य् येँ देय् दयेकूबलय् देय्या रक्षाया नितिं धकाः येँया च्याकू कुनय् तान्त्रिक विधि कथं खड्गाकारय् च्याम्ह अजिमापिं स्थापना यानाः दयेकूगु धया वयाच्वंगु दु । जुजुं च्याम्ह अजिमापिं स्थापना यायेगु झ्वलय् येँया धःक्व लिक्क लुँतिइ लुँति अजिमा स्थापना याःगु खः । लुँति अजिमायात इन्द्रायणी माजु धकाः नं म्हसिका वयाच्वंगु दु । दच्छियंकं थीथी नखःचखः वा जात्रापर्व हनाच्वनीपिं नेवाःतय् बालाचः¥हेया इलय् याइगु लुँति अजिमाया जात्रा व अनया सर्प होम नं छगू बिस्कं व रोचक संस्कृति खः ।
कछलागा चतुर्दशि अथवा मार्गशिर्ष कृष्ण चतुर्दशिया दिनयात नेपालय् बालाचतुर्दशि धकाः हनेगु चलन दु । थुगु दिनय् दच्छिया दुने मदुपिं छेँजः अथवा थःथितिया नामय् आत्माया चीरशान्तिया कामना यासें पशुपतिया श्लेषमान्तक वनय् व्हः वनेगु चलन दु । थुकियात बालू वनेगु धाइ । बालू वनेगु धकाः तछ्व, वा, हाम्वः, छ्व, माय्, चिग्वःगु कय्गू, ताय्, लैं, तःसि, हिसकि, कँय् हलू आदि तयाः पशुपति क्षेत्रया देगः देगलय् व्हव्हं चाःहिलेगु याइगु खः । बालाचः¥हे कुन्हु मृगस्थली वा श्लेष्मान्तक वनय् थथे शतबीज व्हलाः मदुपिनिगु नितिं नसा ज्वलं पिइगु व उगु हे शतबीजं सयावःगु अन्न हे मदुपिन्त दइगु खः धकाः समाजय् विश्वास दया वयाच्वंगु दु । बालाचः¥हेबलय् छगः पु व्हःसां नं छकुचा लुँति पुण्य दइ धकाः धायेगु याः ।
बालाचः¥हेया हे इलय् हे येँय् लुँति अजिमाया जात्रा याइगु प्रसङ्गं लुँति पुण्य व लुँति अजिमाया स्वापू दुला धायेथाय् नं दु । लुँति अजिमायात छाय् लुँति अजिमा धाल धइगु खँय् छपु किम्वदन्ति झीगु समाजय् प्रचलित दु । धयावःकथं लुँति अजिमायात छन्हु बछला माइं भ्वय् सःतल । यक्व मस्त दुम्ह व सम्पत्तिया ल्याखं चीमिम्ह लुँति अजिमा थः मस्त दक्वसित ब्वनाः भ्वजय् थ्यंबलय् भ्वय् सिधयेधुंकूगु जुयाच्वन । यक्व मस्तलिसें हुलिहुलि वःगु लं फिनावःम्ह लुँति अजिमायात बछला माईं दुसिमरि तयाः नकल । अपमान चाःम्ह लुँति अजिमां उगु दुसि मरि अन हे बँय् च्वंगु आँय्पा प्वलाः उकी हे ल्हाकाः ख्वख्वं लिहांवल ।
थथे ख्वख्वं लिहां वयाच्वंगु इलय् छम्ह ज्यापुं खंकाः लुँति अजिमायात फसि छगः बियाछ्वत । थथे फसि ब्यूगु थाय् धइगु थौंकन्हय्या फसिक्यबय् खः । ज्यापुयाके फसि कयाः छेँय् वनाः उगु फसि मस्तय्त नकेत धकाः दयेकाच्वंबलय् फसि लुँइ हिलावन व वयां लिपा लुँति अजिमा नं तमि जुल । व धुंकाः सकल तःकेहेँपिन्सं नं लुँति अजिमायात हनाबना तयेगु यात ।
गनं गनं धाःसा लुँति अजिमां फसि दयेकाः लुँ जूगु मखसें नयेपित्याःपिं मस्तय्त थ्व हे सां नके धकाः लँय् सिनाच्वंम्ह ताहाः (सर्प) छम्ह यंकूगु व व हे सर्पयात तानाः दयेकाच्वंबलय् लुँ जूगु धइगु नं धयातःगु लुइकेफइ । न्ह्यात्थेसां लुँति अजिमाया बाखनय् लुँया सन्दर्भ स्वानाच्वंगु दुगु जुल । व चीमिम्ह लुँति अजिमायात लुँ चूलायेधुंकाः लुँति अजिमाया जीवनय् सुख वःगु धइगु ल्याखं लुँति अजिमा धया वयाच्वंगु खनेदत । बालाचः¥हेबलय् लुँति अजिमाया जात्रा जुइगु इलय् सर्पाहुति होम याइगुलिं नं लुँति अजिमां हःम्ह सीम्ह सर्प लुँ जूगु खँयात बः बियाच्वंगु दु । लुँति अजिमाया जात्राया झ्वलय् बालाचः¥हे छन्हु न्ह्यः त्रयोदशिया बाचाय् थन मेमेगु थीथी हलंज्वलं, पशुपंक्षीलिसें ताहाः नं होम यायेगु याइ । बालाचतुर्दशि छन्हु न्ह्यः त्रयोदशिया बाचाय् बिष्णुमति खुसि सिथय्च्वंगु लुँति अजिमाया देगः न्ह्यःने दुगु यज्ञकुण्डय् बीबः स्वीनितालिसें बुइँचा, न्या, बखुं, म्येय् छ्यंया लिसें सर्प नं होम यायेगु याइ ।
थुकथंया तजिलजिया धार्मिक मान्यता थःगु थासय् दयेफु । तर छुं नं नेवाः तजिलजियात स्वल धाःसा उगु तजिलजिइ तान्त्रिक मतं थाय् कयाच्वंगु दया हे च्वनी । व उगु तजिलजिं झीगु दैनिक जीवनयात माःगु शिक्षा नं बियाच्वंगु दइ । अजिमा धयाकथं हे शाक्त परम्परा हे खत । गथे शाक्त परम्पराय् पुरुष स्वयां नं स्त्रीशक्तिया हे अप्वः थाय् दयाच्वनी, व हे कथं झीगु नेवाः समाजय् नं द्यः वा सांस्कृतिक परम्पराय् मिसा द्यः वा स्त्रीशक्तिया हे महत्व आपाः दयाच्वनी । दक्कले क्वय् शक्ति पृथ्वी तत्वया रुपं व दक्कले च्वय् पुरुष वा शिव आकाश तत्वया रुपं च्वनाः उकिया दथुइ जल, वायू व अग्नि दयाच्वंगु थासय् जुयाच्वनीगु श्रृष्टि हे तन्त्र खः । बालाचः¥हेया सर्पाहुति होमय् नं थुकथं हे पञ्चतत्वया दथुइ श्रृष्टिया प्रक्रियायात हे निरन्तरता बियाच्वंगु खनेदु ।
थुगु होमय् स्वीनिता बीबः लिसें प्यम्ह जीवया होम याइ । होम धयाकथं मि च्यानाच्वनीगु धकाः ला धायेमाःगु हे मखुत । होमया अग्नि तत्वय् आकाशय् ब्वयाज्वीम्ह बखुं, झीगु जःखः बुँइ, क्यबय् ब्वयाजुइम्ह, झीसं सासः ल्हायेगु फसय् ब्वयाजुइम्ह बुँइचा, लखय् च्वनीम्ह न्यालिसे च्यानाः दक्कले न्हापां नौ अले चा जुयावनीम्ह म्येय्या छ्यं होम याइ । ताहाःयात स्वल धाःसा थ्व ब्वये नं फु, लखय् नं च्वनेफु, बँय् नं च्वनेफु अले च्यानाः नौ नं जुयावनी । थुकथं पञ्चतत्वया हे प्रतीकया रुपय् बालाचः¥हेया इलय् याइगु सर्पाहुतिइ होम यायेगु यानाच्वंगु दु । व थुगु होमं नं पृथ्वीतत्व व आकाशतत्व दथुइया जुयाच्वनीगु श्रृष्टि व संहारयात हे प्रतिविम्बित यानाच्वंगु दु ।

Views: 79

Comments