महाकबि गिरीजाप्रसाद जोशी

महाकबि गिरीजाप्रसाद जोशी

   ने. स. ११३६ कछलाथ्व द्वादशि          करुणराज

उमेर ला गुलि हे दूगु खः धकाः । तर छु याये, द्यवं च्वयाहःगु हे उलि खनी । याकनं हे वन । खँ खः, गिरीजाप्रसाद जोशीया । नेपालभाषा साहित्य ख्यःया महाकबि । जक पीगुदँ दुबलय् वय्कलं थुगु संसार त्याग यानाद्यूगु खः ।
वय्कःया जन्म नेपाल सम्बत १०५८ स येँया सक्वय् जूगु खः । शिक्षादिक्षाया झ्वलय् वय्कलं बिक्रम सम्बत २०१३ सालय् एस.एल.सी पास यानादिल । अथे हे २०२६ सालय् आइ ए व २०३२ सालय् बि एड पास यानादिल । जीवनय् वय्कः यक्व हे पेशाय् आवद्ध जुयादिल । २०१३ सालय् वय्कलं पिपा जागीर नयादिल । तक्सारय् खरदार नं जुयादिल । २०१७ सालय् रोड ट्रान्सपोर्ट अर्गनाइजेशनय् जागीर नयाः तःदँ हेटौंडाय् हे च्वनादिल । तर अप्वः थे ई वय्कलं शिक्षण पेशायात हे बियादिल । सक्वया भाग्योदय माबि प्राइमरी स्कूल जूबलय् अन शिक्षक जुयादिल । लिपा २०२४ सालय् वय्कलं आनन्दकुटि बोर्डिङ स्कुलय् ब्वंकादिल । वयां लिपा बालकुमारी माबि, शान्ति शिक्षा मन्दिरय् नं ब्वंकादिल । २०२५ सालय् वय्कः हाकनं भाग्योदय स्कुलय् हे लिहां झाल ।
शिक्षण पेशाय् नं वय्कलं नेपाल भाषाया सेवा यायेगु त्वःता मदी । २०३८ सालतक्क भाग्योदय माबिइ शिक्षण यायेगु झ्वलय् अन वय्कलं अंग्रेजीया नापनापं नेपालभाषा नं ब्वंकादीगु खः । २०३८ सालय् वय्कः थी थी कारणं भद्रवासया आदर्श मा.बिइ ब्वंकः झाल । २०४० सालय् चुगांय वय्कः राष्ट्रिय माबिया हेडमास्टर तक्क नं जुयादिल । उगु हे स्कुलय् हेडमास्टर जुयाच्वच्वं हे नेपाल सम्बत ११०७य् येँयाः पुन्ही कुन्हु वय्कः मदूगु खः ।
वय्कःया जहान परीवारया खँ ल्हाय्बलय् वय्कःया इहिपा २०१७ सालय् मय्जु माया श्रेष्ठनाप जूगु खः । वय्कःया निम्ह काय्पिं दी, कुञ्ज जोशी अले यचु जोशी ।
वय्कःया साहित्यिक पलाःया खँ ल्हाय्बलय् वय्कलं २०१३ साल न्ह्यः हे थुगु ख्यलय् पलाः न्ह्याका दी धुंकूगु खनेदु । २०१३ सालय् वय्कलं त्रि चन्द्र कलेजय् जूगु साहित्य सम्मेलनय् दक्कले न्हापां सिरपाः त्याकाद्यूगु खनेदु । वयां लिपा वय्कलं यक्व हे सिरपाःत त्याकादीगु दु । सक्वय् जुइगु दबू प्याखंया नितिं ला वय्कलं दँय्दसं हे थःगु च्वसा न्ह्याकादीगु दु । गुलिं प्याखंया नितिं वय्कलं म्ये च्वयादिल सा गुलिं अभिनय नं यानादिल । गुलिं ला वय्कलं म्ये नं हालादिल । सामाजिक ज्याय् नं वय्कः उलि हे सक्रिय खनेदु । थः हेटौंडा च्वनाच्वंगु इलय् अन नं वय्कलं नेपालभाषाया पुचः स्वनेगु, नेपालभाषाया गतिबिधि न्ह्याकेगु यानादिल । ०१८ सालय् चिराग सफुकुथि स्वनेगु, २०३२ सालय् जयबली क्लब स्वनेगुलिइ नं न्ह्यज्याना दिल ।
पीगुदँया जकया जीवन दुने वय्कलं यक्व हे बांबांलाःगु कृतित नेपालभाषा साहित्यायत बियादीगु दु । मुक्कं वय्कःया न्हयेयुगूति सफू पिदंगु खनेदु । काब्य, प्याखं, उपन्यास, म्ये आदि यानाः पिदंगु वय्कःया थी थी कृति मध्ये सिलुस्वां उपन्यास तसकं चर्चित जूगु खः । सिलुस्वां उपन्यासं ला नेपालभाषाया साहित्य ख्यलय् न्हूगु कथंया बहशया हे थालनी याःगु खनेदु । नापं बिपात्र, छि स्यानाः हत्या, व ल्वहँ जि झ्वाला नं तसकं हे चर्चित उपन्यासत खः । वय्कलं च्वयादीगु म्येया खँ ल्हायेबलय् दक्कले लोकं व्हाःगु म्ये धइगु हाइ हाइ रे थ्वंया बात्चा धकाः धाइ । खय्त नं गिरीजा प्रसाद जोशी धइकथं हे हाइ हाइ रे थ्वंया बात्चा लुमना हे वइ । साहित्ययात वय्कलं जीवन्त यायेगु कुतलय् हे खइ, थ्वंयागु सवाः वय्कलं धात्थें हे कयादिल । हाइ हाइ रे थ्वंया बात्चा श्रृजना यायेसिबें न्ह्यः वय्कलं गबलें हे त्वनादीगु मदु हं । तर लिपा त्वनादिल । व हे सलिं वय्कःया मृत्युया कारण जुयाबिल । व हे सलिं अथवा व हे थ्वंया बात्चाया हुनिं वय्कः जक पीगुदँ दुबलय् मन्त, क्यान्सर ल्वचं कयाः ।
संकिपा ख्यलय् नं वय्कलं थःगु च्वसा न्ह्याकादीगु खः । चिपनिप व लँपु धइगु निगू फिल्मया स्क्रीप्ट गिरीजा प्रसाद जोशीयागु हे खः । छगू संकिपाया नितिं च्वयातःगु स्क्रीप्ट पिहां हे मवःगु नं दु । गिरीजा प्रसाद जोशीया यक्व हे कृतित पिदमनीगु नं दनि । अय्जूगुलिं गिरीजा प्रसाद जोशीया शरीर थौं झीगु दथुइ मदूगु खःसां नं वय्कःया न्हूगु कृति पिदनी मखुत धाये मत्यःनि । नेपालभाषाया ख्यलय्, नेपालभाषा साहित्यया ख्यलय् न्ह्याज्याना च्वंगु संघसंस्था व नेवाः न्ह्यलुवाःतय्सं थुगु खँय् बिचाः याःसा झीसं अझ नं गिरीजा प्रसाद जोशीया न्हूगु कृतित ब्वने खनीतिनि ।

Views: 50

Comments