चिबाखं – बुढाबुढी जुइगु श्राप ला ?

चिबाखं – बुढाबुढी जुइगु श्राप ला ?

   ने. स. ११३६ कछलाथ्व अष्टमि          ज्ञानी आर. मानन्धर

तीर्थमाया भाःत मदुम्ह बिधवा । स्वम्ह काय, निम्ह ब्यागः जुइधुंकल । चीधिम्ह काय् नाप च्वनाच्वंगु दु, म्ह्याय मदु । तःसिं बुँ मियाबिल, मखुसा थःगु ब्वय् लाःगु बुँइ बुँज्या यानाः न्हि छ्वये अःपुइगु तीर्थमायाया । तःसिं बुँ मी धुंकाः थःत लाःगु ब्व नं काय् नं मियाबिल । मियाः वःगु ध्यबां छतजाः छेँ दन । ल्यं दुगु ध्यबा ब्यांकय् थः कलाःया नामय् तयातःगु धाःगु नं मेपिन्सं धाःगुलिं जक सिल तीर्थमायां । अय्न तीर्थमाया सुम्क हे । थः सने मफय्धुंकल । छजु पुंकाः, निछाः नकातःगु हे दु कायनं । जीवन न्ह्यानाच्वंगु दु तीर्थमायाया ।
काय व भौ निम्हं अफिस वनी । न्हय्दंँ दुम्ह मिजंम्ह छय् छम्ह दु, व नं स्कुल वनेधुंकल । स्कुल तः वनेगु, काः वनेगु नं तीर्थमायां हे याइगु । छय् नाप उलि हे भ्यलय्पुं तीर्थमाया ।
छन्हु बहनी बेलि याय्गु इलय् सदां थें डाइनिङ्ग टेबलय तीर्थमाया, काय, भौ व मचा, प्यम्हं जा नयाच्वंगु । तीर्थमायाया बुढी जुइधुंकाः नं जा नय्बलय मल्ता छगः मदय्क जा हे कथुं कुहांमवं । जा ननं हे मल्ता न्ह्यःगु, तस्कं पालूगु लात ला….! ख्वाः छपातं ह्याउँसे च्वनावल । लः त्वंगु, ह्व…..ह्व पुक्क मुसु वल…….! कथुइ च्वंगु जा फुक्क छ्वाराक्क…… काय्या भुइ लात……!
व खनाः भौम्ह हाल ‘छु धइगु पहः थ्व…… उमेर मखय्धुंकल, उप्वः पालू नयमते धकाः सच्छिक्वः धाय्धुन । जिगु खँ ला गन न्यनी…… छन्हु मखु, निन्हु मखु । आः ला अति हे जुल….’
काय्नं नं म्हुतु ल्ह्वन ‘सरीतां धाःगु खँ मन्यनेगु खःसा छ तःरी दाइचिथाय् च्वं हुँ, कन्हय हे जिं छन्त यंकाबिइ………’
‘का वयात फ्रिजया नापं ध्याक्वय् सुकू लानाब्यु…..’ धकाः सरीतायात चीकल ।
सरीतायात छु माल आ……, फ्रिजया नापं सुकु लानाबिल ।
‘का….. वा…. थौंनिसें थन हे का छंगु थाय् ।’
तीर्थमाया थःगु भु ज्वनाः सुकुली फ़्यतूवन । नये ला यःगु हे मखय्धुंकल । काय व भौया खँ न्यन्यं प्वाः जायेधुंकल तीर्थमायाया ।
टेबलय् सरीता मुसुमुसु न्हिलाः जा नयाच्वन । मचायात ‘छु यानाच्वनागु, याकन जा नया द्यं हुँ ।’
मचा जा मनसे सुकुली फ़्यतुनाः फस्वयाः मिखां ख्वबि हायेकाच्वंम्ह थः अजियात पुलुपुलु स्वयाच्वन ।
अबुम्ह ‘याकन नयाः हुँ धाःगु मताःला छं….., छु स्वयाच्वनागु उखे…..’
मचां अबुयात ’कन्हय् कंस मांबाःपिं बुढाबुढी जुल कि थथे याय्गु खःला बाः ……? धका न्ह्यसः तल …..।

Views: 59

Comments