नेवाः दबू औपचारीक रुपं न्ह्यात

नेवाः दबू औपचारीक रुपं न्ह्यात

   ने.सं. ११३५ कछलाथ्व पारु          सं. विराजकाजी राजोपाध्याय

न्हूदँ नेपाल सम्वत् ११३६या आगमनलिसें नेवाः दबू डट कम नं थुगु हे दिनंनिसें औपचारीक रुपं न्ह्याःगु जुल । आइटि ख्यलय् अले संचार ख्यलय् सक्रिय ल्याय्म्हतय्गु पुचलं दयेकूग थुगु वेब पोर्टल थौंनिसें औपचारीक रुपं न्ह्याःगु खः ।
बेलटेक प्रा.लि.पाखें न्ह्याःगु थुगु वेबसाइटया मू आज्जु धइगु हे सकसित आःया विकसित प्रविधी लिसेलिसें न्ह्याकायंकेगु ख । सूचना व प्रविधीया यूगय् झी नं प्रविधीया लिसेलिसें पलाः न्ह्याके फये हे माः । थौंया विकसित प्रविधीयात छ्यलाः सकसित सूसुचित याना तयेगु ताः तयाः थुगु पोर्टल वःगु खः । उकिया लिसें प्रविधीयात फयांफक्व अप्वः छ्यलाः समाजयात प्रबिधीपाखेया लबः उपभोग याके बीग नं थुगु पोर्टलया आज्जु खः ।
झीगु साहित्य, कलाख्यः न्हून्हूग गतिविधित अपडेट यायेगुया लिसें बिचारप्रधान, समयसापेक्ष व झीगु सरोकारया बिषय दुनेया च्वसुत नं ब्वनेफइ । अथे हे साहित्य, कला, व्यवसायिक वा समयसापेक्ष ब्यक्तित्वपिंलिसेंया खँल्हाबल्हाया नापं थुगु दबुलिइ पुलांपिं हनेबहपिं साहित्यकार, कलाकारपिनिगु कृतिया लिसें वय्कःपिनिगु जीवनिया नं डिजिटल अर्काइभया रुपं नं थुगु दबूयात विकास यायेगु जुइ, ताकि झीगु ख्यःया साहित्यकार, कलाकारपिनिगु बारे सीकेत देशय्, विदेशय् च्वंपिन्ततकं थाकु मजुइमा ।
यक्व हे मांअबुपिनि थः मस्तय्त नेवाः नां हे तयेमास्ते वयाच्वनी । अज्याःपिं मांअबुपिन्त अःपुकेबीग नितिं झीसं थुगु हे दबुलिं मचायात नां सेक्सन नं न्ह्याकातयागु दु । थुगु सेक्सनय् वाःपतिकं न्हूगु न्हूग नांत अपडेट नं जुयावनीगु जूगुलिं न्हून्हूगु नांत नं थन लुइकां तुं च्वनेफइ । तजिलजिया बारे अनुसन्धानमूलक, दुग्यंगु जानकारीलिसेंया सामग्री थन न्ह्यब्वयेगु नितिं कुतः यायेगु जुइ । तजिलजि सेक्सनय् झीगु तजिलजिया धार्मिक, पौराणिक, सांस्कृतिक जानकारी जक मखु, वैज्ञानिक कारणयात नं दुवालेगु जुइ ।
थनथाय् दक्कले न्ह्यथनेबहगु खँ धयागु नेवाः दबू पात्रो खः । आःतक्क डिजिटल नेवाः पात्रो थुगु दबुलिइ हे खने दयेकःवःगु खः । आःया नितिं झीसं कम्प्यूटर, मोबाइल वा ट्याब्लेट आदि कथंया डिजिटल मिडियापाखें नेपाल सम्वतया पात्रो स्वयेफइगु कथं थुगु पात्रो न्ह्यब्वयागु दुसा लिपा वनाः थुकियात विकास यानायंकाः मस्तय्सं तकं नं नेवाः दबू पात्रो स्वयाः नेपाल सम्वत्यात अःपुक छ्यलावने फइकथं विकास यायेगु जुइ ।
राज्यया प्यंगूगु अंग धयातःगु संचार ख्यलय् छगू न्हूगु व विस्कं कथंया थाय् दयेकेगु बिचाः ज्वनाः नेवाः दबू संचारया दबुलिइ दंवःगु दु । थ्व दबू सकसिगु मंकाः दबू खः । थुगु मंकाः दबूयात अझ नं बांलाका यंकेत सकसिगु हःपाः व तिबःया आशा नेवाः दबू पुचःयात दु । छुं नं कथंया सल्लाह, सुझाव वा सहलहया नितिं नेवाः दबूया ज्याकू, फोन, इमेलपाखें न्ह्याब्लें नं स्वापू तयादीफइ । नेवाः दबूया लुखा न्ह्याब्लें नं सकसिगु नितिं चालाच्वगु दु ।

Views: 8

Comments