न्हूदँया लसता कलाख्यःलिसे

न्हूदँया लसता कलाख्यःलिसे

   ने. स. ११३५ कौलागा आमै, बुधबार          विराजकाजी राजोपाध्याय

न्हूगु दँ नेपाल सम्बत ११३६ झीगु लुखा न्ह्यःनेसं दु । न्हूदँया लिसें सकसिगु नुगः लसता व उमंगं जायाच्वंगु दइ । थुगु इलय् सकसिनं थःथःगु ख्यलं थःथःगु पहलं न्हूदँया भिन्तुना कालबिल यायेगु ज्या नं जुइ । व हे कथं कलाकारपिनि धाःसा थःथःगु कृति पिथनेगु ज्या नं न्हू दँयात हे लक्षित यानाः यायेगु चलन दु । थुगु न्हूदँय् नं म्येहालामि, संगीतकार वा म्येच्वमिपिनि म्येचाःलिसें म्यूजिक भिडियोया डिभिडिचाः पिथंगु दुसा संकिपाकःमिपिनि नं थःथःगु संकिपा मूहूर्त यायेगु ज्या याःगु दु ।
दक्कले न्हापां ला मय्जु आशिष्मा नकःमिया हे खँ ल्हाये । वय्कलं थम्हं हे छपु म्ये हालाः थः फाय्नतय्त बियादीत्यंगु दु । वय्कःया न्हूगु म्ये छु खः, गज्याःगु खः व सार्वजनिक मजूनिसां थुगु म्ये थुगु हे वेबसाइट नेवाः दबू डट कमपाखें न्यनामिपिनिगु न्ह्यःने हयेगु खँ धाःसा धयादीधुंकल । आःयात थुगु म्येया अडियो जक रिलिज जुइसा लिपा थुकिया भिडियो नं दयेकाः नेवाः दबू डट कमपाखें हे सार्वजनिक यायेगु वय्कःया ग्वसाः दु ।
थुकिया लिसें म्येहालामि भाजु पद्मानन्द शाक्यया मतिनाया सः नं मोहनिबलय् पिदन । भारतया नाकाबन्दिया दथुइ दक्वं मनूत चिकंया नितिं लाइन च्वनाच्वंबलय् नं वय्कलं मोहनि व स्वन्तिया लसताय् भिन्तुना देछासें वय्कलं म्येचाः पिथनादिल । अथे हे मोहनिया हे ई लाकाः किपुलिं भौमचा नांया संकिपा नं पिदंगु खःसा नेपालभाषाया संकिपा ख्यलय् नांदंम्ह छायांकार भाजु शंकर महर्जनं मोहनि व स्वन्तिया लसताय् दशमहाविद्या नांया बृत्तचित्र छगू नं पिथनादिल । थुकिया नापनापं संकिपा ख्यलय् नांजाःम्ह छायांकार भाजु रवि साय्मिं नं नेपालभाषाया संकिपा छगू दयेकीगु जूगु दु । वय्कलं मोहनिया फूलपातिया दिं लाकाः थःगु न्हूगु संकिपा जामनः गुभाःजुया मूहुर्त यानादिल ।
स्वन्तिया न्ह्यःने थ्यंकाः कलाकारपिनिगु कृति पिहांवयेगु ज्या झन हे तच्वःगु दु । नेपालभाषाया संकिपा ख्यलय् मदिक्क संकिपा दयेकाच्वंम्ह संकिपाकःमि भाजु वासु शाहिं छक्वलं हे निगू संकिपा मुहूर्त यानादीगु दु । छगू सामाजिक संकिपा एक से एकया मूहुर्त जुल सा वय्कलं नेवाःतय् आराध्यद्यः कथं नालातःम्ह बुंगद्यःया बिषयस करुणामय नामं छगू यानाः निगू संकिपाया छक्वलं मुहूर्त वासु शाहिपाखें जुल । अथे हे म्येचाःया खँ ल्हायेबलय् न्हूदँया लसताय् नांजाःम्ह कवयित्रि प्रतिसरा साय्मि रचनाय् स्वंगूगु याकः म्येचाः स्वतिकि नं पिदंगु दु । अथे हे सुधीर ख्वबिया याकः रचनाय् प्रणय नांया म्येचाः पिदंगु दुसा म्येहालामि भाजु मोहनकृष्ण श्रेष्ठया याकः सलय् म्येचाः जक मखु, डिभिडिचाः हे पिदंगु दु । वय्कलं थःगु म्येया भिडियो दयेकाः उगु म्यूजिक भिडियोत मुंकाः जिगु लिक्क नामं छगू म्यूजिक भिडियोचाः पिथनादीगु दु । उकिया नापं म्येच्वमि भाजु महेश लँजुवाःया स्वंगूगु याकः म्येचाः यज्जु नं थ्व हे न्हूदँया लसताय् पिदंगु दु ।
थुकथं न्हूदँया लसता लाकाः गुलिसिनं थःगु संकिपाया मुहूर्त याःगु दुसा गुलिसिनं थःगु म्येचाः पिथंगु दु । अथे हे गुलिसिया संकिपा पिदंगु दु । आः थनथाय् झीसं छता खँ धाःसा बिचाः यायेमाःगु खनेदु । कलाकारया थःगु कृति पिकायेत आपालं दुःख सियाः पिकाइ । ई ला उलि हे बी माल हे, नापं थम्हं हे धेबा खर्च यानाः लवःया ल्याःचाः हे मतसे न्यनामि, स्वकुमिपिनिगु नितिं छुं बी ला धइगु जक बिचाः दयाच्वनी कलाकःमिया । तर झीगु दथुइ गुलिखे मनूतय् बिचाः कलाकारं थःगु कृति सितिकं बीमाःगु मानसिकता दयाच्वनी । अथे सितिकं कयाः न्यनेबलय् वा स्वयेबलय् छम्ह कलाकारया श्रम व लाय्या अवमूल्यन जुइगु खँयात ल्वःमंके मज्यू । गथे कलाकारपिन्सं थःगु कलाया माध्यमं झीत भिन्तुना देछात अथे हे झीसं नं उगु कृतियात न्यानाः कलाकःमिया श्रमयात च्वछानाः भिन्तुना देछायेमाः ।

Views: 2

Comments